सञ्चार मन्त्री खरेलको पहलमा दाङका केही क्षेत्रमा इन्टरनेट समस्या समाधान हुँदै
एउटा मन्त्रीले चाहे जनताको समस्या तत्काल समाधान हुनसक्छ” भन्ने उदाहरण प्रस्तुत गरेका छन् सञ्चार तथा सूचना प्रविधि मन्त्री जग्दिश खरेल।
दाङका केही स्थानमा अझै पनि इन्टरनेट र टेलिफोन सेवा नचल्ने समस्या रहँदै आएको विषयमा पत्रकार भोजराज थापाले भिडियोमार्फत र प्रत्यक्षरूपमै मन्त्री खरेललाई जानकारी गराएका थिए।
यसअघि यस्ता समस्या देखिए पनि “गरिदिन्छु” भन्ने जवाफमै सीमित हुने प्रवृत्ति देखिँदै आएकोमा यसपटक मन्त्री खरेलले तत्काल कार्यान्वयनका लागि निर्देशन दिएका छन्।
मन्त्रीको निर्देशनपछि नेपाल टेलिकमले समस्या समाधानका लागि फिल्डमै प्राविधिक टोली खटाएको छ। टेलिकम दाङ डिभिजन कार्यालयका प्रमुख वरिष्ठ इन्जिनियर (आठौँ तह) प्रविण चौधरीको नेतृत्वमा टोलीले बिहीबार बिहानैदेखि काम सुरु गरेको हो।
इन्जिनियर चौधरीका अनुसार,
“घोराही उपमहानगरपालिका–३ र ५ का केही क्षेत्रमा देखिएको नेटवर्क समस्या भौगोलिक बनावटका कारण हो, जहाँ पहाडका अवरोधले सिग्नल नपुग्ने अवस्था बनेको छ। यस समस्याको समाधानका लागि नेपाल टेलिकम, तुल्सीपुर, दाङले 4G नेटवर्क सुधार कार्य तुरुन्तै सुरु गरेको छ। आवश्यक प्राविधिक कामका लागि फिल्डमै टोली खटिएको छ र सम्भव भएसम्म आज साँझ वा ढिलोमा भोलिसम्म समस्या समाधान हुने अपेक्षा गरिएको छ,” उनले जानकारी दिए।
पत्रकार भोजराज थापाले सामाजिक सञ्जालमार्फत लेख्दै,
“मन्त्रीले चाहे जनताको समस्या तत्काल समाधान हुनसक्छ भन्ने उदाहरण बनेका छन् सञ्चार मन्त्री जग्दिश खरेल,”
भन्दै मन्त्रीको सक्रियताप्रति धन्यवाद दिएका छन्।
