ओरेकको तथ्याङ्क : तीन महिनामा सुनसरीमा लैङ्गिक हिंसाका ३३ घटना, २२ वटा घरेलु हिंसा

धरान । महिला पुनर्स्थापना केन्द्र (ओरेक) सुनसरीले सार्वजनिक गरेको पछिल्लो त्रैमासिक तथ्यांकअनुसार जिल्लामा महिलाहरू आफ्नै घरभित्र सबैभन्दा बढी असुरक्षित पाइएका छन् । 

सन् २०२६ को जनवरीदेखि मार्च महिनासम्मको अवधिमा अभिलेख गरिएका कुल ३३ वटा लैङ्गिक हिंसाका घटनामध्ये ६६.६७ प्रतिशत अर्थात् २२ वटा घटना घरेलु हिंसासँग सम्बन्धित रहेका छन् ।

पितृसत्तात्मक सोच, लैङ्गिक असमानता र महिलालाई परिवारको सम्पत्तिका रूपमा हेर्ने प्रवृत्तिले गर्दा सबैभन्दा सुरक्षित मानिने घर नै महिलाका लागि हिंसाको प्रमुख स्थलका रूपमा देखिएको छ । 

ओरेकको तथ्यांकअनुसार हिंसाबाट प्रभावितहरूमा १९ देखि ३५ वर्ष उमेर समूहका महिलाहरूको संख्या सर्वाधिक ७० प्रतिशत रहेको छ, जसले गर्दा उनीहरूको सिर्जनशील र उत्पादनशील समयमा समेत प्रतिकूल असर परिरहेको छ ।

हिंसाका घटनाहरूमा सबैभन्दा बढी अर्थात् ४८.४८ प्रतिशत हिंसा श्रीमानबाटै हुने गरेको पाइएको छ भने प्रभावितहरूमध्ये घरायसी काममा संलग्न महिलाहरू बढी पीडित हुने गरेका छन् । 

सामाजिक लाञ्छना, न्यायको झन्झटिलो प्रक्रिया र घरेलु हिंसालाई निजी मामिलाका रूपमा लिने गलत सामाजिक बुझाइका कारण अझै पनि धेरै घटनाहरू बाहिर आउन नसकेको संस्थाले जनाएको छ ।