बीपी प्रतिष्ठान धरानद्वारा बाढीपीडितका लागि ३७ लाख रुपैयाँ सहयोग

धरान । बीपी कोइराला स्वास्थ्य विज्ञान प्रतिष्ठान धरानले रसुवालगायत बाढी प्रभावित क्षेत्रका नागरिकको राहत तथा उद्धारका लागि ३७ लाख २ हजार रुपैयाँ सहयोग गरेको छ ।

भोटेकोशी नदीमा आएको भीषण बाढीबाट प्रभावित नागरिकलाई सहयोग गर्ने उद्देश्यले प्रतिष्ठानका पदाधिकारी, शिक्षक तथा चिकित्सक, कर्मचारी, विद्यार्थी र पेन्सनरबाट एक दिन बराबरको पारिश्रमिक, भत्ता तथा पेन्सन संकलन गरी उक्त रकम प्रधानमन्त्री दैवी प्रकोप उद्धार कोषमा जम्मा गरिएको प्रतिष्ठानले जनाएको छ ।

प्रतिष्ठानका अनुसार सहयोग रकममा पदाधिकारी तथा शिक्षक/चिकित्सक वर्गका २७८ जनाबाट १० लाख ३४ हजार रुपैयाँ, कर्मचारी वर्गका १ हजार ५६८ जनाबाट १८ लाख १२ हजार रुपैयाँ, सुपर स्पेसियालिटी, स्नातकोत्तर तथा इन्टर्न विद्यार्थी ५१९ जनाबाट ७ लाख १५ हजार रुपैयाँ र पेन्सनर तथा अन्य १३८ जनाबाट १ लाख ४१ हजार रुपैयाँ संकलन भएको छ । यसरी २ हजार ५०३ जनाबाट कुल ३७ लाख २ हजार रुपैयाँ संकलन भएको हो ।

प्रतिष्ठानले प्राकृतिक विपत्तिका कारण जनधनको ठूलो क्षति भएको भन्दै प्रभावित नागरिकप्रति सहानुभूति व्यक्त गरेको छ । बाढीका कारण ज्यान गुमाउनेहरूप्रति श्रद्धाञ्जली अर्पण गर्दै शोकसन्तप्त परिवारजनप्रति समवेदना व्यक्त गरेको प्रतिष्ठानले जनाएको छ ।

स्वास्थ्य सेवा, चिकित्सा शिक्षा तथा अनुसन्धानका क्षेत्रमा काम गर्दै आएको प्रतिष्ठानले विपद्का बेला प्रभावित नागरिकलाई तत्कालीन राहत, उद्धार तथा पुनर्निर्माणमा सहयोग पुर्‍याउने उद्देश्यले सहयोग रकम प्रदान गरेको जनाएको छ । यसअघि पनि विभिन्न महामारी, प्राकृतिक प्रकोप तथा संकटका बेला स्वास्थ्य सेवा प्रदान गर्दै आएको प्रतिष्ठानले जनाएको छ ।

प्रतिष्ठानले बाढी प्रभावित क्षेत्रमा आवश्यक स्वास्थ्य सेवा उपलब्ध गराउन सम्बन्धित सरकारी निकाय, स्थानीय तह, स्वास्थ्य संस्था तथा अन्य निकायसँग समन्वय गरी उपलब्ध स्रोत, जनशक्ति र विशेषज्ञताको अधिकतम उपयोग गर्ने जनाएको छ । प्रतिष्ठानले स्वास्थ्य टोली परिचालन गरी आवश्यक सहयोग उपलब्ध गराउने तयारीसमेत गरेको विज्ञप्तिमा उल्लेख छ ।