ग्यारेन्टी चेक विवादमा हाजी आँखा अस्पतालको स्पष्टीकरण, पूर्वसञ्चालकको दाबी भ्रामक

विराटनगर । विराटनगर–१४ रानीस्थित साविक हाजी आँखा अस्पताल (हाल रानी विराटनगर आँखा अस्पताल प्रालि) ले चार जना पूर्वसञ्चालकले सेयर बिक्रीबापतको रकम बुझिसकेपछि पनि पुनः रकम दाबी गरेको आरोप लगाएको छ ।

अस्पतालले शनिबार जारी गरेको विज्ञप्तिमार्फत पूर्वसञ्चालक डा. गुणराज कट्टेल, ज्याउल कमर, राजेश साह र मो. अतहर अन्सारीले सेयरबापतको रकम नपाएको भन्दै दिएको अभिव्यक्ति निराधार र भ्रामक भएको दाबी गरेको हो ।

अस्पतालका अध्यक्ष मन्नु कुमार गुप्ताका अनुसार चार पूर्वसञ्चालकलाई भुक्तानी गर्नुपर्ने कुल १ करोड ५८ लाख रुपैयाँभन्दा बढी रकम बैंक तथा नगदमार्फत भुक्तानी भइसकेको छ । अस्पतालले भुक्तानी पुष्टि गर्ने बैंक स्टेटमेन्ट तथा अन्य प्रमाण आफूसँग सुरक्षित रहेको जनाएको छ ।

अस्पतालका अनुसार डा. गुणराज कट्टेलले पाउनुपर्ने ५७ लाख ८० हजार रुपैयाँ एक्सेल डेभलपमेन्ट बैंक, ग्लोबल आइएमई बैंक र नगदमार्फत २०८२ माघसम्ममा भुक्तानी गरिएको छ ।
ज्याउल कमरले पाउनुपर्ने १९ लाख ६२ हजार ६०७ रुपैयाँमध्ये १० लाख रुपैयाँ बैंकमार्फत र बाँकी नगद भुक्तानी गरिएको अस्पतालको दाबी छ ।

राजेश साहलाई पाउनुपर्ने ३० लाख ६३ हजार ४०० रुपैयाँको सट्टा ३१ लाख ६५ हजार रुपैयाँ भुक्तानी गरिएको अस्पतालले जनाएको छ । यो पाउनुपर्ने रकमभन्दा १ लाख १ हजार ६०० रुपैयाँ बढी हो ।

त्यस्तै, मो. अतहर अन्सारीलाई पाउनुपर्ने ५० लाख ८० हजार १५६ रुपैयाँमध्ये अधिकांश रकम उनका पिता कादिर अन्सारीको नाममा बैंकमार्फत र बाँकी नगद भुक्तानी गरिएको अस्पतालको भनाइ छ ।

अस्पतालका अनुसार चार जनालाई भुक्तानी गर्नुपर्ने रकमभन्दा बढी गरी हालसम्म १ करोड ५९ लाख ८७ हजार ७६३ रुपैयाँ भुक्तानी भइसकेको छ ।

ग्यारेन्टी चेकलाई लिएर विवाद

अस्पतालका अनुसार सेयर खरिद–बिक्रीका क्रममा ग्यारेन्टीस्वरूप कुमारी बैंकको चेक दिइएको थियो । पूर्वसञ्चालकहरूले त्यही चेकलाई आधार बनाएर अस्पताललाई कालोसूचीमा राख्ने प्रयास गरेको र पुनः रकम दाबी गरेको अस्पतालको आरोप छ ।

अस्पतालले उच्च अदालतको फैसलाको सम्मान गर्दै पुनः १ करोड ६० लाख रुपैयाँ कुमारी बैंकमा जम्मा गरिसकेको जनाएको छ । रकम जम्मा गरिएपछि पनि सम्बन्धित पक्षले रकम नबुझेको र सञ्चारमाध्यममार्फत अस्पताल तथा नेतृत्वविरुद्ध आरोप लगाएको विज्ञप्तिमा उल्लेख छ ।

‘सेयरबापतको रकम बुझिसकेर पनि ग्यारेन्टी चेकलाई आधार बनाएर फेरि रकम असुल्न खोज्नु र अस्पतालको छवि बिगार्नु निन्दनीय छ,’ अध्यक्ष गुप्ताले भने, ‘हामीसँग सबै बैंक स्टेटमेन्ट र भुक्तानीका प्रमाण सुरक्षित छन् । भ्रम फैलाउनेहरूविरुद्ध कडा कानुनी उपचारमा जानेछौं ।’

२०७८ सालमा स्थापना भएको अस्पतालका सुरुवाती १६ जना सञ्चालकमध्ये १५ जनाले सेयर बिक्री गरी बाहिरिसकेको अस्पतालले जनाएको छ । सेयर बिक्री गरेका सञ्चालकहरूको रकम भुक्तानी भइसकेको अस्पतालको दाबी छ ।

यसअघि शनिबार नै चार जना पूर्वसञ्चालकले पत्रकार सम्मेलन गरी सेयरबापतको रकम नपाएको बताएका थिए । उनीहरूको दाबीपछि अस्पतालले भुक्तानी भएको पुष्टि गर्ने बैंक स्टेटमेन्ट र अन्य प्रमाण रहेको जनाएको हो ।