दुहबीमा डेरी, फलफूल पसल, डिपार्टमेन्ट स्टोर र पाउरोटी फ्याक्ट्रीमा संयुक्त अनुगमन

सुनसरीको दुहबी नगरपालिका क्षेत्रमा मिति २०८२ असार १२ गते संयुक्त अनुगमन टोलीद्वारा विभिन्न खाद्य सामग्री उत्पादन तथा बिक्री हुने स्थलहरूमा अनुगमन गरिएको छ। अनुगमन टोलीमा दुहबी नगरपालिकाका उपमेयर सहित खाद्य प्रविधि तथा गुण नियन्त्रण डिभिजन कार्यालय सुनसरी, जिल्ला प्रशासन कार्यालय सुनसरी, घरेलु तथा साना उद्योग कार्यालय सुनसरी, उद्योग वाणिज्य संघ सुनसरीका प्रतिनिधिहरू तथा सञ्चारकर्मीहरू सहभागि थिए।
खाद्य प्रविधि तथा गुण नियन्त्रण कार्यालयको घुम्ती प्रयोगशालाको सहयोगमा दुहबीमा रहेका ४ वटा डेरी पसलमा दूधको मिसावट परीक्षण गरिएको थियो। परीक्षणको क्रममा दूधमा कुनै मिसावट नभएको पुष्टी गरिएको छ।
त्यसैगरी, फलफूल पसल तथा गोदामहरूमा artificial ripener (कृत्रिम पाकाउने रसायन) को प्रयोगबारे निगरानी गरिएको थियो। साथै, एक डिपार्टमेन्ट स्टोर र एक पाउरोटी फ्याक्ट्रीको पनि निरीक्षण तथा अनुगमन गरियो। अनुगमनको क्रममा आवश्यक सुधारका लागि सम्बन्धित व्यवसायीहरूलाई निर्देशन दिइएको जनाइएको छ।
सम्बन्धित कार्यालयहरूद्वारा यस्ता अनुगमनलाई निरन्तरता दिइने र उपभोक्ताको स्वास्थ्य सुरक्षाका लागि अझ प्रभावकारी कदम चालिने प्रतिबद्धता जनाइएको छ।