निशुल्क मधुमेह स्क्रिनिङ : विश्व मधुमेह दिवसका अवसरमा विपी प्रतिष्ठानको स्वास्थ्य अभियान

विश्व मधुमेह दिवसको अवसर पारेर विपी कोइराला स्वास्थ्य विज्ञान प्रतिष्ठान (विपी प्रतिष्ठान), धरानले शुक्रबार बिहान विशेष स्वास्थ्य जागरण कार्यक्रमसहित निशुल्क मधुमेह स्क्रिनिङ सम्पन्न गरेको छ।

मेडिसिन विभागको आयोजनामा “स्वस्थ जीवन जिउन, मधुमेह नियन्त्रण” भन्ने नाराका साथ विहान ५ बजेदेखि ७ बजेसम्म वाक क्याप र्याली निकालिएको थियो। र्याली धरान राघा चोक, पुतली लाइन, भानुचोक, छाताचोक हुँदै पुनः प्रतिष्ठान परिसरमै आएर समापन गरिएको थियो। र्याली पश्चात् प्रतिष्ठानमा मधुमेहका कारण, यसको जोखिम, नियन्त्रणका उपाय तथा उपचारका विधिबारे विस्तृत जनचेतनामूलक कार्यक्रम सञ्चालन गरियो।
कार्यक्रममा चिकित्सकहरूले मधुमेह दुई प्रकारका हुने—टाइप–१ र टाइप–२—बारे जानकारी दिँदै कुन अवस्थामा औषधि सुरु गर्ने, कसले इन्सुलिन प्रयोग गर्नुपर्ने भन्ने विषयमा विस्तृत परामर्श प्रदान गरेका थिए।
यसै क्रममा बराहक्षेत्र नगरपालिका–३ स्थित स्वास्थ्य चौकीमा पनि प्रतिष्ठानका वरिष्ठ मधुमेह विशेषज्ञ डा. रबिन मास्के, जि.आर. डाक्टर तथा नर्ससहित २७ जनाको टोलीले निशुल्क मधुमेह स्क्रिनिङ शिविर सञ्चालन गर्यो। उक्त शिविरमा लियो क्लब अफ धरान ग्लोरीले सहकार्य गरेको थियो।
स्थानीय बृद्ध–बृद्धाहरूका लागि घर नजिकै शिविर सञ्चालन हुनु राहत भएको बताउँदै ७९ वर्षीय पिप नारायण थामी तथा ५५ वर्षीय प्रेमबहादुर खड्काले खेतीपातीको व्यस्त समयमा घर नजिकै स्वास्थ्य सेवा पाउँदा खुशी लागेको प्रतिक्रिया दिए। स्थानीय शम्भु प्रसाद थामीले बृद्धावस्थाका बाबुआमालाई विशेष सुविधा भएको बताए।
शिविरमा करिब २०७ जनाले मधुमेह परीक्षण गराएका थिए। बिरामीहरूलाई सुगर तथा प्रेसरका औषधि समेत निशुल्क वितरण गरिएको डा. प्रदीप बास्तोलाले जानकारी दिए।
मधुमेह परीक्षणका लागि करिब ३–४ सय जनासम्मलाई सेवा दिन लक्ष्य राखिएको र सोहीअनुसार आउँदो शनिबार बिहान १० बजेदेखि साँझ ४ बजेसम्म पुनः त्यही स्थानमा निशुल्क स्वास्थ्य परामर्श शिविर सञ्चालन गरिने मेडिसिन विभाग प्रमुख डा. मास्केले जानकारी दिएका छन्।