विराट मेडिकल कलेजद्वारा क्यान्सर सर्भाइभर र उपचाररत बिरामीसँग अन्तरक्रिया कार्यक्रम

विराटनगर — विश्व क्यान्सर दिवसको अवसरमा विराट मेडिकल कलेज एण्ड टिचिङ हस्पिटलले क्यान्सर सर्भाइभर तथा हाल उपचाररत क्यान्सर बिरामीसँग अन्तरक्रिया कार्यक्रम सम्पन्न गरेको छ। कार्यक्रममा क्यान्सरको पीडा, उपचारको अनुभव तथा क्यान्सर जितेर अघि बढेको जीवनबारे बिरामीका भावना बुझ्दै उनीहरूलाई हौसला प्रदान गर्ने उद्देश्य राखिएको थियो।
प्रदेशभरिबाट करिब ४५ जना क्यान्सर सर्भाइभर तथा उपचाररत बिरामीको सहभागिता रहेको उक्त कार्यक्रमको उद्घाटन विराट मेडिकल कलेजकी मेडिकल अनकोलोजिस्ट विशेषज्ञ डा. अस्मिता राईमाझीले पानसमा दीप प्रज्वलन गरी गर्नुभएको थियो। कार्यक्रममा सर्जरी विभागका डा. शुल्भ सापकोटा, डा. नरेन्द्र पण्डित तथा अर्थोपेडिक विशेषज्ञ डा. राउल मण्डलको उपस्थिति रहेको थियो।
अन्तरक्रिया कार्यक्रममा चिकित्सकहरूले बिरामीका भावना, विचार र पीडा सुन्दै क्यान्सरलाई लिएर मनमा रहेको डर हटाउन सके सामान्य जीवन जस्तै जीवनयापन गर्न सकिने धारणा राखे। डा. अस्मिता राईमाझीले मृत्यु सबैको लागि निश्चित भए पनि त्यसको कारण फरक–फरक हुने उल्लेख गर्दै क्यान्सर लागेर नै मृत्यु हुन्छ भन्ने डरबाट मुक्त हुनुपर्ने बताउनुभयो। उहाँले क्यान्सरको उपचार पद्धति काठमाडौं, राजीव गान्धी क्यान्सर सेन्टर वा अन्य ठूला अस्पतालमा जस्तै विराट मेडिकल कलेजमा पनि समान रहेको जानकारी दिँदै केही सुविधा र उपकरणमा मात्र अन्तर हुने स्पष्ट पार्नुभयो।
क्यान्सरका लक्षण देखिएपछि ढिलाइ नगरी नजिकैको स्वास्थ्य संस्थामा गएर उपचार सुरु गरे क्यान्सर फैलिने सम्भावना कम हुने डा. राईमाझीको भनाइ थियो। उहाँले बिरामीसँग चिकित्सकको सकारात्मक, आत्मीय र हौसलापूर्ण व्यवहार औषधिभन्दा पनि प्रभावकारी हुने उल्लेख गर्दै पाठ्यपुस्तकभन्दा बढी बिरामीका अनुभवबाट आफूहरूले धेरै सिक्ने गरेको बताउनुभयो। क्यान्सर लाग्दा जीवन सकियो भनेर कमजोर नबनी साहसका साथ अगाडि बढ्न सके बिरामीको आयु लम्बिने पनि उहाँको धारणा थियो।
अर्थोपेडिक विशेषज्ञ डा. राउल मण्डलले उपचारपछि बिरामीहरू खुसीका साथ समय बिताइरहेको देख्दा चिकित्सकहरूलाई पनि थप ऊर्जा मिल्ने बताए। क्यान्सर नियन्त्रणमा स्वस्थ खानपान र नियमित शारीरिक व्यायामको ठूलो भूमिका रहने उनको भनाइ थियो।
सर्जन डा. शुल्भ सापकोटाले क्यान्सरलाई समयमा पहिचान गर्न सके किमोथेरापी, रेडियोथेरापी तथा शल्यक्रियामार्फत उपचार सम्भव हुने बताए। उहाँले क्यान्सर उपचार खर्चिलो भएकाले सरकारले यस्ता जटिल रोगको निःशुल्क उपचार नीति ल्याए नागरिकहरू स्वास्थ्य सेवाबाट वञ्चित हुनुपर्ने अवस्था नआउने धारणा राख्नुभयो। ढिलो गरी चौथो चरणमा पुगेका बिरामीमा उपचार प्रभावकारी नहुने अनुभव पनि उहाँले साझा गर्नुभयो।
त्यस्तै, डा. नरेन्द्र पण्डितले क्यान्सर बिरामीप्रति समाज र परिवारले सकारात्मक व्यवहार र उचित हेरचाह गर्न सके बिरामीलाई थप प्रेरणा मिल्ने र क्यान्सरको जोखिमसमेत घट्ने बताए।
कार्यक्रममा इनरुवा, पथरी, खनार, विराटनगर, इटहरी, झुम्का, विराटचोक, तरहरा र धरानलगायत स्थानबाट आएका करिब ४५ जना बिरामी सहभागी थिए। कार्यक्रममा क्यान्सर जनचेतनामा योगदान पुर्‍याउने र नयाँ बिरामीलाई हौसला प्रदान गर्ने पाँच जना क्यान्सर सर्भाइभरलाई मायाको चिनो प्रदान गरी सम्मान गरिएको थियो। साथै अन्य सहभागी बिरामीलाई उपहार तथा यातायात खर्चसमेत प्रदान गरिएको आयोजकले जनाएको छ।