रास्वपामा आन्तरिक असन्तोष: नेताको सामाजिक सञ्जालमार्फत घोर असन्तुष्टि

धरान, असार १५ — राष्ट्रिय स्वतन्त्र पार्टी (रास्वपा) को कोशी प्रदेशमा आन्तरिक असन्तोष चुलिएको छ। पार्टी केन्द्रीय अनुशासन आयोगले अनुशासन प्रक्रिया अघि बढाएको विषयमा कोशी प्रदेश समितिले प्रेस विज्ञप्ति सार्वजनिक गर्दै गम्भीर आपत्ति जनाएको छ। विज्ञप्तिमा पार्टीको विधि, विधान, र प्रक्रिया विपरित ‘व्यक्तिवादी स्वार्थ’ र ‘गुटबन्दी’को आरोप लगाइएको छ।

विज्ञप्ति अनुसार, केन्द्रीय अनुशासन आयोगको नाममा व्यक्तिगत फोटो सहितको अनुशासनात्मक पत्र सार्वजनिक गर्दै गरिएका क्रियाकलापले संगठनमा नकारात्मक प्रभाव पारेको छ। विज्ञप्तिमा भनिएको छ, “पार्टीको नाम र संरचनालाई कमजोर बनाउने, झुटा प्रचारबाजी, आन्तरिक एकता खल्बल्याउने नियत प्रष्ट छ।”
यता, पार्टीकै एक नेताले सामाजिक सञ्जाल फेसबुकमा लामो स्टाटस लेख्दै इटहरी अधिवेशनमा भएका गतिविधिबाट आफू गहिरो असन्तुष्ट रहेको जनाएका छन्। स्टाटसमा उनले “मुकुलको इजार समाएर गुटबन्दी गर्नेहरू” भन्दै पार्टी भित्रको व्यक्तिवादी, अवसरवादी चरित्रको आलोचना गरेका छन्। उनले लेखेका छन्, “इटहरीको अधिवेशन रोकेर आफूखुसी भर्ती गराउन खोज्नेहरू घिनलाग्दो राजनीतिको भण्डाफोरको अभियान सुरु गर्न बाध्य बनाइरहेछन्।”
उनले पार्टीभित्र “गुटबन्दी गर्ने, चरित्र हत्या गर्ने, पदकै नाममा धम्की दिने” व्यक्तिहरूको पहिचान भएको र यदि समयमै सुधार नगरेमा ती सबको नाम सार्वजनिक गर्ने चेतावनीसमेत दिएका छन्। यस्तै, उनले ‘राइट टु रिजेक्ट’को माग गर्ने तयारीसमेत गरिरहेका छन्।
यस प्रकरणले पार्टीभित्र बढ्दो असन्तोष र अनुशासनहीनताको संकेत दिएको छ। रास्वपा कोशी प्रदेशको नेतृत्वले यस विषयलाई कसरी सम्हाल्नेछ भन्ने प्रतीक्षा गरिनेछ।