नेभिगेशन
राजनीति

देउवामाथिको आक्रमणलाई गलत भन्नुको सट्टा गगन पक्षले नेतृत्वलाई नै अपराधीकरण गर्‍यो : डा. महत

धरान । नेपाली काङ्ग्रेसका नेता डा. प्रकाशशरण महतले सभापति शेरबहादुर देउवामाथि भएको साङ्घातिक आक्रमणको विरोध गर्नुको सट्टा गगन थापा पक्षले नै नेतृत्वलाई अपराधीकरण गरेको आरोप लगाएका छन् ।

नेपाली काङ्ग्रेसको १५औँ नियमित महाधिवेशनअन्तर्गत सुनसरी जिल्ला अधिवेशन तथा घोषणा कार्यक्रममा बुधबार धरानमा आयोजित कार्यक्रममा बोल्दै महतले काङ्ग्रेसको इतिहासमै नभएको घटना भएको भन्दै पार्टीमाथि प्रपञ्च रचिएको बताए ।

देउवामाथिको आक्रमणलाई गलत भएको भन्नुपर्नेमा गगन पक्षले त्यसलाई अपराधीकरण गरेको उनको आरोप थियो । काङ्ग्रेसलाई कमजोर बनाउन पार्टीको मूल धारलाई नै नेतृत्वबाट हटाउने प्रयास भएको उनले बताए ।

महतले नेपाली काङ्ग्रेस राष्ट्रियताको सवालमा सधैँ उभिँदै आएको र देउवासमेत राष्ट्रियताको पक्षमा दृढ रहेको बताए । पार्टीको मूल विचार र सिद्धान्त छाडेर काङ्ग्रेसलाई कमजोर बनाउने प्रयास भइरहेको उनको भनाइ थियो ।

गगन थापा पक्षले प्रजातान्त्रिक समाजवादको मुद्दा छाडेको आरोप लगाउँदै उनले सामाजिक प्रजातन्त्रको कुरा गरेर राष्ट्रिय स्वतन्त्र पार्टी (रास्वपा) का मुद्दा बोकेर हिँडेको टिप्पणी गरे ।
‘नेपाली काङ्ग्रेसको आत्मा गगन पक्षमा छैन,’ उनले भने, ‘काङ्ग्रेसको विचार, विधान र संस्कार छाडेर हिँड्नेहरू पार्टीको मूल भावना बोकेर हिँडिरहेका छैनन् ।’

महतले नेपाली काङ्ग्रेसको आधिकारिकता आफूहरूले नै प्राप्त गर्ने दाबी गरे । ‘देशमा न्याय मरेको छैन । न्याय नै यो देशमा मर्‍यो भने त जे पनि हुने भयो,’ उनले भने ।

प्रकाशित मिति:
प्रतिक्रिया दिनुहोस्
थप राजनीति