काङ्ग्रेस देउवा समूहको सुनसरी–१ मा सुब्बा चयन, प्रदेशसभा ‘क’ र ‘ख’ सर्वसम्मत

धरान । नेपाली काँग्रेसको १५औँ महाधिवेशनअन्तर्गत देउवा समूहको सुनसरी क्षेत्र नम्बर १ को सभापतिमा गणेश सुब्बा निर्वाचित भएका छन् । क्षेत्रीय अधिवेशनसँगै प्रदेशसभा ‘क’ र ‘ख’ को सभापति समेत सर्वसम्मत नेतृत्व चयन भएको छ । 

बुधबार धरान–१९ धनकुटे रोडस्थित सुनसरी पार्टी कार्यालयमा सम्पन्न अधिवेशनले तीनवटै तहका कार्यसमिति सर्वसम्मत चयन गरेको हो । अधिवेशनबाट सुनसरी क्षेत्र नम्बर १ को सभापतिमा सुब्बा निर्वाचित भए भने सचिवमा सन्दीप सुवेदी र नवीन ढकाल तथा सहसचिवमा मेरिना राईसहित ३५ सदस्यीय कार्यसमिति निर्वाचित भएका छन् ।

यता प्रदेशसभा ‘क’ को सभापतिमा शालिग्राम आचार्य निर्वाचित भएका छन् भने उपसभापतिमा सुरज श्रेष्ठ र निमा लामा तथा सचिवमा श्रीजल भट्टराईसहित २१ सदस्यीय कार्यसमिति सर्वसम्मत रुपमा निर्वाचित भएका छन् । प्रदेश अधिवेशन प्रतिनिधिमा कोपिला मोक्तान, सन्दीप मोक्तान, विमला घिमिरे र चन्द्रमान तामाङ चयन भएका छन् ।

प्रदेशसभा ‘ख’ को सभापतिमा ज्ञानबहादुर तामाङ निर्वाचित भएका छन् भने उपसभापतिमा प्रकाश बस्नेत तथा सचिवमा नरेन्द्र खड्कासहित २१ सदस्यीय कार्यसमिति सर्वसम्वत रुपमा चयन भएका छन् । प्रदेश अधिवेशन प्रतिनिधिमा वर्षा गुरुङ र मनिल राई चयन भएका छन् ।

अधिवेशनको अध्यक्षता १५औँ महाधिवेशन सुनसरी संयोजक सन्दिप श्रेष्ठले गरेका थिए । कार्यक्रममा नेपाली काँग्रेसकी केन्द्रीय सदस्य तथा महाधिवेशनका लागि केन्द्रीय प्रतिनिधि लक्ष्मी खतिवडालगायत नेता तथा कार्यकर्ताको उपस्थिति रहेको थियो ।