धरान–१६ की अनिता राईको शव कोशी नदी किनारमा फेला

धरान–१६ की १९ वर्षीया अनिता राई कोशी नदीमा डुबेर बेपत्ता भएको दुई दिनपछि मृत अवस्थामा फेला परेकी छन्।
बराहक्षेत्र–१ चतराघाटस्थित दूधपानी खोलाबाट शुक्रबार दिउँसो बेपत्ता भएकी अनिताको शव आइतबार बिहान कोशी नदी किनारमा तैरिरहेको अवस्थामा भेटिएको इलाका प्रहरी कार्यालय महेन्द्रनगरका प्रहरी निरीक्षक दिवस कुँवरले जानकारी दिए।
उनका अनुसार राजाबासस्थित २६–८८ नोजबाट करिब १५० मिटर तलको भागमा अनिताको शव फेला परेको हो। शव घुँडादेखि तल वालुवाले पुरिएको र अन्य भाग जमीनमाथि तैरिरहेको अवस्थामा भेटिएको प्रहरीले जनाएको छ।
अनिता र उनका बुबा जीवन राई शनिबार दिउँसो बराहक्षेत्र मन्दिरको दर्शन गरेर फर्किने क्रममा मोटरसाइकलसहित दूधपानी खोलाले बगाएको थियो। सो क्रममा बुबा जीवन राईलाई स्थानीयले सोही दिन सप्तकोशी नदी किनारबाट जिवितै उद्धार गरेका थिए। अहिले उनको स्वास्थ्य अवस्था सामान्य रहेको प्रहरीले जनाएको छ।
शनिबार अपराह्न करिब १ बजे वर्षासँगै आएको भलले मोटरसाइकलसहित बाबुछोरीलाई खोलामा बगाएर कोशी नदीमा पुर्याएको थियो। स्थानीयले घटनाको जानकारी प्रहरीलाई दिएपछि खोजी कार्य सुरु गरिएको थियो।
आइतबार बिहानैदेखि गोताखोरको टोली परिचालन गरी खोजी जारी राखिएकोमा अन्ततः अनिताको शव भेटिएको प्रहरीले पुष्टि गरेको छ।