नेभिगेशन
समाचार

औलिया बाबा निशान यात्राका लागि साधु महात्माको आगमन

सुनसरी । हरिबोधनी एकादशीदेखि पूर्णिमासम्म वराहक्षेत्रमा लाग्ने मेलाका लागि देशविदेशबाट साधु/ सन्त/ नागाबाबा र सन्यासीको औलिया मठ चतराधाममा आगमन भएको छ । 

मठका महन्त विनायक पुरीका अनुसार निशान यात्रामा भारतको राजस्थानस्थित जोधपुरबाट मठाधीश बालब्रह्मचारी नागाबाबा कनैयागिरीजी महाराज, जानकी मन्दिर जनकपुरका उत्तराधिकारी महन्त रामरोशन दास, गोरखनाथ पीठ काठमाडौंका योगी व्यग्रवेदनाथ स्वामी, कामाख्या गुवाहाटीधामका श्रीमान् सेक्रेटरी उमाशंकर पुरीजी महाराज, थानापति नित्यानन्दजी महाराज तथा थापाथलीस्थित राममन्दिर उदासीन अखडाका रामस्वरूप दासजी महाराजलगायत विभिन्न साधुसन्त तथा नागाबाबाको सहभागिता रहनेछ ।

औलिया मठबाट आगामी चतुर्दशीका दिन निशान यात्रा निस्कने छ । नागा साधुहरूले र्‍यालीसहित निशान झण्डा वराहक्षेत्र पुर्‍याउनेछन् । तथ्यअनुसार १५औँ शताब्दीदेखि साधुसन्तहरूले विधिवत् रूपमा सञ्चालन गर्दै आएको निशान यात्राको धार्मिक परम्परालाई यस वर्ष थप व्यापक र भव्य स्वरूपमा आयोजना गर्न लागिएको मठाधीश महन्त पुरीले जानकारी दिए ।

'औलिया मठबाट सुरु हुने निशान यात्रालाई देश तथा विदेशबाट सहभागी हुने सन्यासी, नागा साधु तथा विभिन्न धार्मिक सम्प्रदायका सन्तमहन्तहरूले विशेष आकर्षण प्रदान गर्नेछन् ।' उनले भने । 

विभिन्न स्थानबाट आउने साधुसन्त, नागा बाबा तथा भक्तजनको सहभागिताले यस वर्षको निशान यात्रा धार्मिक तथा सांस्कृतिक दृष्टिले विशेष महत्त्वपूर्ण हुने वराहक्षेत्र मन्दिर गुठी व्यवस्थापन समितिका अध्यक्ष भक्तबहादुर श्रेष्ठले बताए ।  औलिया मठबाट निस्कने निशान यात्रालाई वराहक्षेत्रसम्म पुर्‍याइने छ भने पूर्णिमाका दिन निशानलाई पुनः औलिया मठमा फर्काइने परम्परा छ । 

प्रकाशित मिति:
प्रतिक्रिया दिनुहोस्
थप समाचार