श्रीलंका टप्पुमा मतदान केन्द्र निर्माण गर्न प्रमुख जिल्ला अधिकारीसहितको स्थलगत निरीक्षण

सुनसरी । वराहक्षेत्र नगरपालिका वडा नं. ६ र ९ मा पर्ने श्रीलंका टप्पुमा मतदान केन्द्र माग उठिरहेका बेला स्थलगत निरीक्षण गरिएको छ । वडा नं. ६ टप्पुस्थित जनता माध्यमिक विद्यालयमा प्रमुख जिल्ला अधिकारी ईश्वरीप्रसाद रिजालसहितको टोलीले निरीक्षण गरेको वराहक्षेत्र नगरपालिकाका नगरप्रमुखको सचिवालयले जनाएको छ । 

सुनसरी जिल्लामा प्रतिनिधिसभा सदस्य निर्वाचन, २०८२ का क्रममा मतदान स्थलहरूको स्थलगत अनुगमनबाट प्राप्त प्रतिवेदनका आधारमा मतदान स्थल तथा मतदान केन्द्रको पुनरावलोकन र व्यवस्थापन गर्ने विषयमा राजनीतिक दल, स्थानीय तह तथा सरोकारवालाबीच सहमति जुटेको भोलि पल्ट बिहीबार प्रमुख जिल्ला अधिकारीसहित सुरक्षा निकायको टोलीले निरीक्षण गरिएको हो ।

मतदान स्थलहरूको स्थलगत अनुगमन गरी तयार पारिएको प्रतिवेदन गृह मन्त्रालयअन्तर्गत शान्ति सुरक्षा तथा अपराध नियन्त्रण शाखामा पठाइएको विषयमा बुधबार आयोजित बैठकमा सहभागीलाई जानकारी गराइएको थियो । बैठकमा राजनीतिक दलका प्रमुख तथा प्रतिनिधि, स्थानीय तहका प्रमुख र अन्य सरोकारवालाहरूको सहभागिता रहेको थियो ।

बैठकले अनुगमन प्रतिवेदनले औंल्याएका विषयहरूको आवश्यक सम्बोधन गर्न सम्बन्धित वडा कार्यालयहरूले समन्वय गरी कार्यान्वयनमा लैजाने सहमति गरेको छ । त्यसैगरी, मतदान स्थल पुनरावलोकनका क्रममा राजनीतिक दलका प्रतिनिधि, स्थानीय तहका प्रमुख तथा अन्य सरोकारवालाहरूबाट उठाइएका विषयलाई सम्बोधन गर्न जिल्ला मतदान स्थल तथा मतदान केन्द्र सिफारिस समितिमार्फत स्थलगत अनुगमन गर्ने निर्णय गरिएको थियो  । 

बैठकले मतदातालाई सहज रूपमा मतदान गर्न पाउने अधिकार सुनिश्चित गर्न छलफलमा उठेका केही मतदान स्थललाई आवश्यकताअनुसार विभाजन गरी नयाँ मतदान स्थल कायम गर्न सम्बन्धित वडा मतदान स्थल तथा मतदान केन्द्र सिफारिस समितिलाई अनुरोध गर्ने निर्णयसमेत गरेको थियो ।

नयाँ मतदान स्थल कायम गर्ने प्रक्रियाका लागि आवश्यक मतदाता नामावली, अनुसूची फारामलगायत प्राविधिक सहयोग जिल्ला निर्वाचन कार्यालयले उपलब्ध गराउने सहमति भएको छ । त्यस्तै, मतदान स्थल परिवर्तन वा थपघट गर्नुपर्ने भए मतदान स्थल तथा मतदान केन्द्र निर्धारण कार्यविधि, २०८१ अनुसार प्रक्रिया पूरा गरी सम्बन्धित वडा समितिबाट सर्वसम्मत निर्णय गराएर जिल्ला मतदान स्थल तथा मतदान केन्द्र सिफारिस समितिमा पठाउनुपर्ने निर्णय गरिएको छ ।

वडा समितिबाट प्राप्त निर्णय तथा प्रमाणित अनुसूचीहरूको विवरण एकीकृत गरी जिल्लास्तरीय समितिको अर्को बैठक बोलाएर थप छलफल गर्ने निर्णय पनि बैठकले गरेको छ ।बैठकका यी निर्णयले सुनसरी जिल्लामा मतदान स्थल तथा मतदान केन्द्रको व्यवस्थापनलाई थप व्यवस्थित, सहज र मतदातामैत्री बनाउन सहयोग पुग्ने अपेक्षा गरिएको छ ।

वराहक्षेत्र नगरपालिकाको आयोजना तथा विश्व खाद्य कार्यक्रम र निड्स नेपालको प्राविधिक सहयोगमा पूर्वानुमानदेखि पूर्वकार्यसम्म बाढी पूर्वतयारी, पूर्वकार्य तथा प्रतिकार्य सम्बन्धी एकीकृत कृत्रिम घटना अभ्यास (सिमेक्स) कार्यक्रम अन्तर्गत तेस्रो दिन स्थलगत कृत्रिम घटना अभ्यासका क्रममा प्रमुख जिल्ला अधिकारी रिजाल, जिल्ला प्रहरी कार्यालयका प्रमुख पुष्पराज मल्ल, सशस्त्र प्रहरी वबल सुनसरीका प्रमुख लभकुमार सापकोटा, राष्ट्रिय अनुसन्धान सुनसरीका प्रमुख विमल घिमिरे, राष्ट्रिय विपद् जोखिम न्युनीकरण तथा व्यवस्थापन प्राधिकरणका उपसचिव राजेन्द्र शर्मा, नेपाल मौसम विज्ञान विभागकी वरिष्ठ मौसमविद् उपसचिव विभूति पोखरेललगायतको उपस्थिति थियो ।