अन्तरिम सरकारको नेतृत्वमा सुशीला कार्कीको नाम टुंगो,

काठमाडौँ । नेपाली सेनाको समन्वयमा राष्ट्रपति रामचन्द्र पौडेल, प्रधानसेनापति अशोकराज सिग्देल र जेन-जी आन्दोलनका युवा प्रतिनिधिहरूबीच अन्तरिम सरकार गठनबारे आज निर्णायक छलफल हुने भएको छ ।
जेन-जी प्रतिनिधिहरूले अन्तरिम सरकारको नेतृत्वका लागि पूर्वप्रधानन्यायाधीश सुशीला कार्कीलाई नयाँ प्रधानमन्त्रीका रूपमा प्रस्ताव गरिसकेका छन् । आज हुने छलफलबाट उक्त प्रस्तावलाई औपचारिकता दिने तयारी भइरहेको बुझिएको छ।
कार्की निकट स्रोतका अनुसार उनीसँग सेना र जेन-जी पक्षबीच पहिले वार्ता हुने र त्यसपछि राष्ट्रपति पौडेलसँगको छलफलमार्फत परिस्थिति अनुसार निष्कर्ष निकाल्ने तयारी छ।
राष्ट्रपति पौडेल र प्रधानसेनापति सिग्देलले बिहीबार बिहानैदेखि जेन-जी प्रतिनिधिहरूसँग वार्ता गरेर मुलुकको राजनीतिक निकास निकाल्ने विश्वास गरिएको छ।
यसैबीच, काठमाडौं महानगरपालिकाका मेयर बालेन शाहले समेत कार्कीको नाममा समर्थन जनाइसकेका कारण उनी अहिले जेन-जी आन्दोलनको एक मात्र सहमति उम्मेदवारका रूपमा देखिएकी छन्।