नेकपा माओवादी केन्द्रका उपमहासचिव शर्माद्वारा अध्यक्ष प्रचण्डको राजीनामा माग

नेकपा माओवादी केन्द्रका उपमहासचिव जनार्दन शर्माले पार्टी अध्यक्ष पुष्पकमल दाहाल ‘प्रचण्ड’को तत्काल राजीनामा माग गरेका छन्। उनले हालसालै बढेको ‘जेन-जी आन्दोलन’लाई ऐतिहासिक मोडका रूपमा लिँदै पार्टी र देशलाई नयाँ ढंगले अगाडि बढाउनुपर्ने औंल्याएका छन्।
शर्माले प्रस्तुत गरेका १६ बुँदे प्रस्तावमा भ्रष्टाचार, दलतन्त्र, नेता तन्त्र, कमिसनतन्त्र र दलालीप्रति जेन-जी आन्दोलनले प्रहार गरेकाले त्यसको सकारात्मक संश्लेषण गर्नुपर्ने बताएका छन्। साथै, वर्तमान सरकारलाई सहयोग गर्दै आगामी निर्वाचनमा जाने वातावरण बनाउनुपर्नेमा जोड दिएका छन्।
उनले पार्टीभित्र सम्पत्ति छानबिनको पुरानो माग कार्यान्वयन गर्न स्वतन्त्र व्यक्तिको नेतृत्वमा आयोग गठन गर्नुपर्ने तथा २०४६ पछि पदमा बसेका सबै जिम्मेवार व्यक्तिहरूको सम्पत्ति छानबिन गर्न उच्चस्तरीय आयोग बनाउनुपर्ने माग समेत अघि सारेका छन्।
शर्माले अध्यक्ष प्रचण्डसहित पार्टीको शीर्ष नेतृत्वले तत्काल राजीनामा दिनुपर्ने र नेतृत्व चयन प्रणाली प्रत्यक्ष निर्वाचित मोडेलमा लैजानुपर्ने बताएका छन्। त्यस्तै, कुनै पदमा एउटै व्यक्तिले पटक–पटक बस्न नपाउने गरी स्पष्ट नीति बनाउनुपर्ने पनि उनको प्रस्तावमा उल्लेख छ।
उनले वर्तमान निर्वाचन प्रणाली अन्त्य गरी पूर्ण समानुपातिक प्रणालीमार्फत संसद् निर्माण गर्ने, प्रत्यक्ष निर्वाचित कार्यकारी राष्ट्रपतिको व्यवस्था ल्याउने र दलित–महिलाको प्रश्न समाधान गर्ने आवश्यकतामा जोड दिएका छन्। साथै, सांस्कृतिक विचलन र यौन अराजकताजस्ता घटनाहरूको छानबिन गर्नुपर्ने धारणा पनि उनले राखेका छन्।
शर्माले शहीद, बेपत्ता परिवार, घाइते योद्धा तथा अशक्त वृद्धहरूको संरक्षण गर्ने नीति बनाउने, स्वरोजगार अभियानमार्फत श्रम र उत्पादनलाई सबल बनाउनुपर्ने र राष्ट्रियताको रक्षा पार्टीको प्राथमिक एजेन्डा हुनुपर्ने बताएका छन्।
उनको भनाइअनुसार, यी लक्ष्य पूरा गर्न पार्टीको संगठनात्मक संरचना समेत पुनःसंरचना गर्नुपर्ने देखिएको छ।