धरानमा राष्ट्रिय परिवर्तन पार्टीको बृहत् सभा सम्पन्न

धरान — राष्ट्रिय परिवर्तन पार्टीले शनिबार धरानमा बृहत् सभा आयोजना गर्दै ‘जेन जी’ (Gen Z) युवाले उठाएको सुशासन, रोजगारी र भ्रष्टाचारविरुद्धको आन्दोलनलाई राजनीतिक रुपान्तरण गर्ने प्रतिबद्धता जनाएको छ। सभामा वक्ताहरूले देशको विकास, युवाको स्वदेशमै रोजगारी र भ्रष्टाचारको अन्त्य बिना वास्तविक परिवर्तन सम्भव नहुने बताएका छन्।
सभालाई सम्बोधन गर्दै पूर्व आइजीपी तथा पार्टीका केन्द्रीय अध्यक्ष सरबेन्द्र खनालले आफू पदमा रहँदा धेरै नेताहरूको भ्रष्ट नियत नजिकबाट देखेको दाबी गर्दै भ्रष्टाचारकै कारण देश विकासको मार्गमा अघि बढ्न नसकेको बताए। उनले भ्रष्टाचारी नेतालाई कानुनी कठघरामा उभ्याउने अठोट व्यक्त गर्दै राष्ट्रिय परिवर्तन पार्टीले नै अब देशको नेतृत्व गर्ने दाबी गरे। नयाँ उदाउँदै गरेका दलहरू एकजुट भए पुराना दलहरू क्रमशः कमजोर हुँदै जाने उनको भनाइ थियो।

खनालले जेन जी आन्दोलन युवाहरूको न्यायपूर्ण माग भएको उल्लेख गर्दै आन्दोलनपछि बनेको सरकार र मन्त्री परिषद्ले प्रारम्भमा आश्वासन दिए पनि पछि पुरानै नीतितर्फ फर्किन खोजेकाले युवाहरूको सपना कुण्ठित भएको बताए। त्यसै कारण जेन जीका मागलाई संस्थागत गर्न राष्ट्रिय परिवर्तन पार्टी राजनीतिको मैदानमा आएको उनको भनाइ छ।

जेन जी आन्दोलनका घाइते तथा पार्टी अध्यक्ष राजेन्द्र पोर्तेलले भदौ २४ गतेको आन्दोलनमा खुट्टा गुमाएको स्मरण गर्दै आफ्नै बलिदान र सहिद युवाहरूको सपनालाई जीवित राख्न पार्टी स्थापना गरिएको बताए। “घाइते र सहिदको भावना माथि खेलवाड भयो, अब जेन जी युवाहरूले आफ्ना माग आफैं पूरा गर्ने समय आएको छ,” उनले भने।
पोर्तेलले देशभरिका जेन जी युवाहरूको मुख्य माग सुशासन, भ्रष्टाचारको अन्त्य र स्वदेशमै रोजगारी भएको स्पष्ट पार्दै फागुन २१ गते मतदानका बेला भदौ २३ र २४ को आन्दोलन सम्झेर विवेकपूर्ण मत हाल्न आग्रह गरे। उनले बेरोजगारीकै कारण जेन जी आन्दोलन जन्मिएको बताउँदै पुरानो सोच र सत्ता नबदलिए लाखौं युवाको भविष्य संकटमा पर्ने चेतावनी दिए।

वक्ताहरूले जेन जी आन्दोलन कुनै जात, वर्ग वा समुदायविरुद्ध नभई शुद्ध रूपमा भ्रष्टाचारविरुद्धको आन्दोलन भएको उल्लेख गरे। अपांगता, गरिबी वा पहिचानका आधारमा हुने विभेदको आलोचना गर्दै उनीहरूले देश परिवर्तनको हुटहुटीले आफूहरू राजनीतिमा आएको बताए।
सभामा भदौ २३ र २४ को आन्दोलन झल्काउने नाटक, नृत्य तथा कविता वाचन प्रस्तुत गरिएको थियो। सभामा धरान,इटहरी,धनकुटा,भरोल र इनरुवा बाट करिव ५० जनाले पार्टी प्रवेश गरेका थिए। जेन जि  आन्दोलनको बारे लेखिएको कविता पुस्तक विमोचन समेत गरेका थिए। कार्यक्रममा धरान उपमहानगरपालिकाका मेयर हर्क साम्पाङको उपस्थिति नभएको विषयमा समेत टिप्पणी गरिएको थियो।
राष्ट्रिय परिवर्तन पार्टीले विशुद्ध युवाका एजेन्डा—रोजगारी, शिक्षा, सुशासन र भ्रष्टाचारविरुद्धको कठोर कदम—लाई केन्द्रमा राखेर देशभर अभियान विस्तार गर्ने जनाएको छ।