आशिका तामाङद्वारा काठमाडौँ–२ र ९ बाट स्वतन्त्र उम्मेदवारी घोषणा

काठमाडौँ — सामाजिक अभियन्ता आशिका तामाङले आगामी हुने प्रतिनिधिसभा निर्वाचनमा काठमाडौँ निर्वाचन क्षेत्र नम्बर २ र ९ लाई प्राथमिकतामा राख्दै स्वतन्त्र उम्मेदवारी घोषणा गर्नुभएको छ। केही हप्तादेखि पछिल्लो राजनीतिमा प्रवेश गर्ने वा नगर्ने विषयमा गम्भीर आत्ममन्थन र छलफलपछि उक्त निर्णयमा पुगेको उहाँले सामाजिक सञ्जालमार्फत जानकारी गराउनुभएको हो।
तामाङले विगत केही हप्तामा सरोकारवालासँग प्रत्यक्ष संवाद, सामाजिक सञ्जालमार्फत मत सर्वेक्षण तथा विशेषगरी Gen-Z पुस्ताका युवायुवतीसँग उनीहरूको अपेक्षा, चिन्ता, मुद्दा र चाहनाबारे खुला छलफल गरेको बताउनुभयो। ती छलफलबाट सकारात्मक सुझावसँगै आलोचनात्मक तथा नकारात्मक प्रतिक्रियाहरू समेत प्राप्त भएको र ती सबैलाई समान रूपमा सम्मान गरेको उहाँको भनाइ छ।
जनभावना र प्राप्त सुझावलाई मनन गर्दै दलगत राजनीतिभन्दा माथि उठेर स्वतन्त्र धारमा अघि बढ्नु वर्तमान सन्दर्भमा जिम्मेवार निर्णय भएको ठहर गर्दै आफू कुनै पनि राजनीतिक दलमा आवद्ध नहुने निर्णयमा पुगेको तामाङले उल्लेख गर्नुभएको छ।
उहाँले विशेषगरी Gen-Z पुस्ताले उठाइरहेका आवाज, मुद्दा र परिवर्तनको चाहनालाई सडकदेखि सदनसम्म सशक्त रूपमा प्रतिनिधित्व गरिनुपर्ने आवश्यकता महसुस गर्दै स्वतन्त्र उम्मेदवारी दिएको बताउनुभयो। यो उम्मेदवारी व्यक्तिगत महत्वाकांक्षाभन्दा पनि नयाँ पुस्ताको आवाज, जवाफदेही राजनीति, पारदर्शिता र व्यावहारिक समाधानको प्रतिबद्धताबाट प्रेरित रहेको उहाँको दाबी छ।
“युवाहरूको सपना, उनीहरूको भविष्य र देशको समग्र हितका लागि दृढ, स्वतन्त्र र निर्भीक रूपमा अघि बढ्नेछु,” तामाङले आफ्नो प्रतिबद्धता व्यक्त गर्नुभएको छ। साथै उहाँले स्वच्छ र सचेत राजनीतितर्फको यात्रामा सबैको सुझाव, समर्थन र सहकार्यको अपेक्षा समेत गर्नुभएको छ।
आफ्नो अठोट सार्वजनिक गर्दै तामाङले युवा पुस्ताको भावनाको कदर, सडकदेखि सदनसम्म जनसरोकारका मुद्दा उठाउने तथा भ्रष्टाचारविरुद्ध निरन्तर लडाइँ गर्ने उल्लेख गर्नुभएको छ। भगवान् श्री पशुपतिनाथको कृपा र जनताको साथ नै आफ्नो शक्ति भएको भन्दै उहाँले “हाम्रो साझा यात्रा अब सुरु भयो” भन्ने सन्देशसमेत दिनुभएको छ।