धरानमा नेपाल कम्युनिस्ट पार्टी (एकीकृत मार्क्सवादी–लेनिनवादी) को बृहत क्षेत्रीय जनसभा, हजारौंको सहभागिता

धरान — नेपाल कम्युनिस्ट पार्टी (एकीकृत मार्क्सवादी–लेनिनवादी) (एमाले) ले धरानमा बृहत क्षेत्रीय जनसभा आयोजना गरेको छ। कार्यक्रममा हजारौं समर्थकहरूको सहभागिता रहेको आयोजकले जनाएको छ।

कार्यक्रमका प्रमुख अतिथि मनिराम गौतमले पार्टीको विगतदेखि हालसम्मको विकास यात्राबारे चर्चा गर्दै देश निर्माणमा एमालेको भूमिका उल्लेख गरे। उनले २०४६ सालपछिको राजनीतिक परिवर्तनदेखि पूर्वाधार विकास, शिक्षा सुधार तथा अशक्त र ज्येष्ठ नागरिक लक्षित कार्यक्रमहरूमा एमालेको योगदान रहेको दाबी गरे।
गौतमले विपक्षी दलका उम्मेदवारहरूले साना कामलाई अतिरञ्जित गरेर भ्रम फैलाउने प्रयास गरेको आरोप लगाउँदै देशलाई अगाडि बढाउने स्पष्ट नीति र दृष्टिकोण एमालेसँग मात्रै रहेको बताए। उनले सुनसरीको विकासका लागि शिक्षित र कानुनमा दक्ष युवाहरूलाई पार्टीले उम्मेदवार बनाएको उल्लेख गरे।
कार्यक्रममा बोल्दै पूर्व उपमेयर मञ्जु भण्डारीले नयाँ दलका उम्मेदवारहरूको घोषणापत्रप्रति प्रश्न उठाइन्। उनले जनभावनालाई सम्मान गर्दै यथार्थपरक योजना अघि सार्नुपर्ने बताइन्।

सुनसरी क्षेत्र नं. १ का एमाले उम्मेदवार टीकाराम माङ्लेन लिम्बूले सुशासन, शिक्षा, स्वास्थ्य सेवा विस्तार, अस्पताल सुधार, मर्चरी भवन निर्माण लगायतका योजनामा काम गर्ने प्रतिबद्धता व्यक्त गरे।
समानुपातिक उम्मेदवार मौसम राईले अधुरा विकास निर्माण कार्यलाई पूर्णता दिने, महिला रोजगारी सिर्जना गर्ने तथा बालबालिका र महिलासम्बन्धी कानुनलाई व्यवहारिक कार्यान्वयनमा जोड दिने प्रतिबद्धता जनाइन्।
पूर्व सांसद जयकुमार राईले पुराना राजनीतिक दलप्रति नकारात्मक धारणा फैलाउने प्रवृत्तिको आलोचना गर्दै मदन राजमार्ग, धरान–पानवारी सडक, बराहक्षेत्र सडक, सर्दु पुल, बसपार्क लगायतका पूर्वाधार निर्माणमा एमालेको योगदान रहेको दाबी गरे।
त्यस्तै, पूर्व सांसद प्रदीप भण्डारीले आफ्नो कार्यकालमा सडक, शिक्षा, विद्युत् विस्तार, सुकुम्बासी तथा भूमिहीनका पक्षमा बजेट विनियोजन गरी काम गरेको उल्लेख गरे। उनले मतदातालाई विगतको योगदानको मूल्यांकन गरेर मतदान गर्न आग्रह गरे।
कार्यक्रममा सहभागी जनताको उत्साहपूर्ण उपस्थितिले एमालेप्रति जनविश्वास रहेको नेताहरूले दाबी गरे।