नक्कली प्रमाणपत्र बिक्री प्रकरणः पौडेललाई मोसो दल्ने २ युवा पक्राउ

धरानः सिटिइभिटीका सहायक निर्देशक तथा बिपि कोइराला प्राविधिक शिक्षालयका प्राचार्य गोविन्द पौडेलले नक्कली प्रमाणपत्र बिक्री गरी आर्थिक लाभ लिएको आरोप लगाउँदै संगठनले उनलाई कालो मसी दलेर जनकारवाही गरेको छ।


शिक्षा क्षेत्रमा व्यापक रुपमा फैलिएको विकृति, विसङ्गति र अवैध कारोवारको विरुद्ध अखिल नेपाल राष्ट्रिय स्वतन्त्र विद्यार्थी युनियन (क्रान्तिकारी) ले सञ्चालन गरिरहेको “राष्ट्रका लागि विद्यार्थी अभियान” अन्तर्गत दुई जना पक्राउ परेका छन्।

संगठनका अनुसार सिटिइभिटी अन्तर्गतको परीक्षा नियन्त्रण कार्यालयमा कार्यरत गण्डक प्रदेश संयोजक आयुष भण्डारी र केन्द्रीय सदस्य समेत रहेका सन्देश महतोलाई पक्राउ परेका हुन्।

बिहिबार सार्वजनिक गरिएको प्रेस विज्ञप्तिमा पौडेलमाथि फेल भएका विद्यार्थीलाई अवैध रुपमा पास गराउने, नक्कली प्रमाणपत्र बिक्री गर्ने, परीक्षा र मूल्याङ्कन प्रक्रियामा भ्रष्टाचार गर्ने, आर्थिक लेनदेनका आधारमा कर्मचारी नियुक्त गर्ने, संस्थाको गरिमा घटाउने जस्ता गम्भीर आरोपहरू लगाइएको छ।

अखिल (क्रान्तिकारी)ले चेतावनी दिँदै भनेको छ, “यदि गोविन्द पौडेललाई कानुनी रूपमा कारबाही नगरी संस्थागत चलखेललाई संरक्षण दिने प्रयास गरियो भने थप संघर्षका कार्यक्रम घोषणा गरिनेछ।”

संगठनले सिटिइभिटी शुद्धिकरण अभियान अन्तर्गत दलाल, माफिया र बिचौलियाहरूको पहिचान गरी चरणबद्ध रुपमा पर्दाफास र कारबाही गरिरहने बताएको छ।