धरान–कालाबञ्जार मार्गको वन क्षेत्रबाट १९ किलो गाँजासहित युवक पक्राउ ,

सुनसरी : सुनसरीको बराहक्षेत्र नगरपालिका–१ अन्तर्गत अमहा सामुदायिक वन क्षेत्रबाट प्रहरीले ठूलो मात्रामा लागू औषध गाँजासहित एक युवकलाई पक्राउ गरेको छ।
शनिबार राति करिब १० बजे विशेष सूचनाका आधारमा प्रहरी टोली धरान–कालाबञ्जार मार्गस्थित वन क्षेत्रमा खटिएको थियो। चेकजाँचका क्रममा प्रदेश १–०२–०५१ प ४८३ नम्बरको मोटरसाइकलमा सवार दुई जना व्यक्ति प्रहरी देख्नासाथ जंगलतर्फ भागेका थिए।
उनीहरूमध्ये धनकुटा नगरपालिका–९ निवासी २१ वर्षीय लक्ष्मण मेरीलाई प्रहरीले नियन्त्रणमा लिएको हो। फरार अर्का व्यक्तिको खोजी भइरहेको प्रहरीले जनाएको छ।
पक्राउ परेका मेरीको बयानका आधारमा गरिएको खोजतलासमा कालो झोलाभित्र राखिएका १८ पोका गाँजा फेला परेको प्रहरीले जनाएको छ। ती पोखाहरूमा झण्डै १९ किलो बढी गाँजा रहेको पप्रहरीले जनाएको छ।

गाँजा र मोटरसाइकलसहित मेरीलाई इलाका प्रहरी कार्यालय महेन्द्रनगरमा राखी थप अनुसन्धान भइरहेको प्रहरीले जनाएको छ।