⁩धरानमा २६औँ वडा कार्यसमिति स्तरीय साकेला सिली प्रतियोगिता सम्पन्न, धरान–१९ प्रथम

धरान । किरात राई समुदायको महान सांस्कृतिक पर्व साकेला उभौली २०८६ को अवसरमा आयोजित २६औँ वडा कार्यसमिति स्तरीय साकेला सिली प्रतियोगिता तथा प्रदर्शनी भव्य रूपमा सम्पन्न भएको छ। प्रतियोगितामा वडा कार्यसमिति धरान–१९ प्रथम भएको छ भने धरान–१८ दोस्रो र धरान–९ तथा १० संयुक्त रूपमा तेस्रो भएका छन्।

प्रतियोगितामा प्रथम हुने टोलीलाई नगद ४० हजार रुपैयाँ, दोस्रो हुने टोलीलाई ३० हजार रुपैयाँ तथा तेस्रो हुने टोलीलाई २५ हजार रुपैयाँसहित प्रमाणपत्र प्रदान गरिएको आयोजकले जनाएको छ।

कार्यक्रमका प्रमुख अतिथि श्रम संस्कृति पार्टीका केन्द्रीय अध्यक्ष तथा सुनसरी क्षेत्र नम्बर–१ का सांसद हर्क साम्पाङ राई ले साकेला पर्व किरात समुदायको धर्म, संस्कृति, रीतिरिवाज तथा पहिचान संरक्षण गर्ने महत्वपूर्ण पर्व भएको बताएका छन्। उनले सम्पूर्ण किरात यायोक्खाहरूले आफ्नो सिली, भेषभूषा र मौलिक पोशाक झल्किने खालका नृत्य प्रस्तुत गर्दा संस्कृतिको संरक्षण र पुस्तान्तरणमा ठूलो योगदान पुग्ने बताए।

उनले भने, 'किरात राईहरूको सभ्यता, इतिहास, भूगोल र संस्कृतिको सम्मान हाम्रो संकल्प हो ।'  उनले साकेला उभौली पर्वले समुदायको पहिचान अझ सशक्त बनाउने विश्वास व्यक्त गरे। साथै नेपालका सबै जातजातिले आफ्ना धर्म र संस्कृतिको संरक्षण गर्नुपर्ने भए पनि सबैभन्दा माथि नेपाली पहिचान रहेको उल्लेख गर्दै देश विकासका लागि सबै एकजुट हुनुपर्ने धारणा राखे।

सांसद साम्पाङले साकेला सिली नृत्य श्रम, प्रकृति र जीवनसँग जोडिएको सांस्कृतिक अभिव्यक्ति भएको बताए। धान रोप्ने, धान काट्ने, चराचुरुङ्गीको चालचलन तथा प्रकृतिका गतिविधिलाई सिलीमार्फत अभिव्यक्त गरिने भएकाले पुर्खाले चलाएर ल्याएको संस्कृतिलाई निरन्तरता दिनु नै साकेलाको मूल उद्देश्य भएको उनको भनाइ थियो।

उनले आफू धरान उपमहानगरपालिकाको प्रमुख हुँदा धरानबासीको हितका लागि काम गरेको स्मरण गर्दै खानेपानीलगायत विकासका योजनालाई प्रभावकारी रूपमा अघि बढाउन संघीय संसद्मा पुग्नुपरेको बताए। स्थानीय तहमा मात्र बसेर आवश्यक बजेट तथा योजना सुनिश्चित गर्न कठिन भएकाले धरानको दीर्घकालीन विकासका लागि प्रतिनिधिसभामा पुगेको उनको भनाइ थियो।

'सरकारले जनभावना विपरीत काम गर्‍यो'

सांसद साम्पाङले वर्तमान सरकारले जनताको भावना विपरीत काम गरिरहेको आरोपसमेत लगाए। सुकुम्बासीहरूलाई व्यवस्थित नगरी डोजर चलाउँदा जनतामा असन्तुष्टि बढेको उल्लेख गर्दै सरकारले जनताको भावना र आवश्यकतालाई केन्द्रमा राखेर काम गर्नुपर्ने बताए। संसद्मा समेत आफूले जनताको पक्षमा निरन्तर आवाज उठाइरहेको उनले बताए।

कार्यक्रममा विशिष्ट अतिथिका रूपमा धरानका पूर्वमेयर तिलक राई उपस्थित थिए । विशेष अतिथि दोर्पध्वज राईले किरात समुदाय संगठित भएर आफ्नो धर्म, संस्कृति, भेषभूषा र पुर्खाले प्रयोग गरेका सामग्रीको संरक्षणमा जुटिरहेको बताए। पहिले मौलिक पोशाक र संस्कृतिलाई लिएर उपहास हुने गरे पनि अहिले समुदायमा आफ्नो पहिचान जोगाउनुपर्ने चेतना विस्तार भएको उनको भनाइ थियो।

कार्यक्रममा किरात यायोक्खाका सहसचिव इन्दिरा राई, कोषाध्यक्ष मेनुका राई, पूर्व पर्यटनमन्त्री सुदन किराती, पत्रकार महासंघ सुनसरीका अध्यक्ष सन्तोष काफ्ले लगायतको उपस्थिति  थियो। कार्यक्रमको सभापतित्व राजेन्द्र राईले गरेका थिए।