विराटनगर विमानस्थलबाट २६ लाख ९८ हजार रुपैयाँसहित दुई जना पक्राउ

धरान । विराटनगर विमानस्थलबाट काठमाडौं प्रस्थान गर्न लागेका दुई जना यात्रु २६ लाख ९८ हजार रुपैयाँसहित  पक्राउ परेका छन् । 

आइतबार दुवै जनालाई मोरङ प्रहरीले नगदसहित सार्वजनिक गरेको छ । 

वैशाख १८ गते बेलुका करिब ८ बजे बुद्ध एयरको उडानमार्फत काठमाडौं जान लागेका सुनसरीको धरान उपमहानगरपालिका वडा नं. १८ बस्ने ३५ वर्षीय दिलीप तामाङ पक्राउ परेका थिए । उनको साथबाट स्रोत नखुलेको ११ लाख रुपैयाँ बरामद गरिएको प्रहरीको भनाइ छ । 

यस्तै वैशाख १९ गते दिउँसो करिब साढे ३ बजे श्री एयरलाइन्सको उडानबाट काठमाडौं जान लागेका भारतको मालदा जिल्ला सुजागन्ज सिन्धा चन्चला बस्ने ३६ वर्षीय मोहिदिल अलि पक्राउ परेका छन् । प्रहरीले उनको झोलाबाट स्रोत नखुलेको १५ लाख ९८ हजार रुपैयाँ फेला पारेको थियो ।

जिल्ला प्रहरी कार्यालय मोरङका अनुसार नियमित सुरक्षा जाँचका क्रममा दुवै जनाबाट स्रोत नखुलेको रकम भेटिएको हो । प्रहरीले उनीहरूलाई नियन्त्रणमा लिएको छ ।

दुवै जनाबाट बरामद भएको कुल रकम २६ लाख ९८ हजार रुपैयाँ छ ।  प्रहरीले हाल दुवै व्यक्तिसँग विस्तृत बयान लिइरहेको छ । रकम अवैध कारोबार, हुण्डी, वा अन्य आपराधिक गतिविधिसँग सम्बन्धित भए/नभएकोबारे समेत अनुसन्धान अघि बढाइएको प्रहरीको भनाइ छ । विमानस्थल सुरक्षालाई थप कडाइ गरिएको र यस्ता गतिविधि नियन्त्रणका लागि नियमित निगरानी बढाइएको पनि प्रहरीले जनाएको छ ।

(फाइल तस्बिर)