खेललाई व्यवसायिकरण बनाउनु पर्नेमा जोड

बराहक्षेत्र, सुनसरी — युवा पुस्तालाई खेलकुदप्रति समर्पित गराउँदै गाउँ–गाउँबाट दक्ष खेलाडी उत्पादन गर्ने उद्देश्यले बराहक्षेत्र नगरपालिका वडा नं. ३ का स्थानीय युवाहरुले ‘जय नेपाल खेलकुद मञ्च’ गठन गरेका छन्।
खेलकुद मार्गदर्शन २०८१ को परिच्छेद ३ र ४ अनुसार मञ्चको विधिवत स्थापना प्रक्रिया अघि बढाउँदै हाललाई तदर्थ समिति गठन गरिएको छ। गठन पश्चात आयोजित पदस्थापन तथा उद्घाटन कार्यक्रममा प्रमुख अतिथिका रुपमा नेपाली काँग्रेस कोशी प्रदेश सदस्य, कोशी प्रदेश फुटबल संघका अध्यक्ष तथा मञ्चका संरक्षक किशोर राईले पानसमा बत्ती बालेर कार्यक्रमको उद्घाटन गर्नुभएको हो।
उद्घाटनपछि मन्तव्य दिंदै अध्यक्ष राईले खेलकुद क्षेत्रको विकासका लागि व्यवसायिकरण अपरिहार्य भएको बताउनुभयो। उहाँले खेलाडीलाई सुविधा र अवसर उपलब्ध गराउन सके उनीहरुले खेल क्षेत्रमै आफ्नो भविष्य खोज्न सक्ने भन्दै स्थानीय तहले अझ प्रभावकारी पहल गर्नुपर्ने आवश्यकता औँल्याउनुभयो। साथै उहाँले समर्पित खेलाडी उत्पादन गर्न मञ्चको भूमिका उल्लेखनीय हुने विश्वास व्यक्त गर्नुभयो।
कार्यक्रममा विशेष अतिथिका रुपमा बोल्दै वडा नं. ३ का वडाध्यक्ष राजदिप लामाले मञ्चलाई शुभकामना दिँदै यसले खेलकुद मात्र नभई सामाजिक सेवामा समेत टेवा पुर्‍याउने अपेक्षा व्यक्त गर्नुभयो। उहाँले वडाले निरन्तर रुपमा फुटबल तथा भलिबल प्रतियोगिताहरू सञ्चालन गर्दै आएको जानकारी दिँदै नवगठित मञ्चले यस कार्यमा थप ऊर्जा दिने विश्वास व्यक्त गर्नुभयो।
मञ्चको नेतृत्व पन्नुलाल धामीले गर्नुभएको छ भने उपाध्यक्षमा राजकुमार राई, सचिवमा गोविन्द शाह, कोषाध्यक्षमा ध्वजवीर लिम्बु, सहसचिवमा नमस धामी चयन हुनु भएको छ। त्यस्तै सदस्यहरूमा चेतमान बानिया, लक्ष्मण थापा, रामकुमारी राई र अनिता धामी रहनुभएको छ।
उक्त अवसरमा नेपाली काँग्रेस इकाई सभापति शिशिर तामाङ, क्षेत्रीय सल्लाहकार रामराज महत, महाधिवेशन प्रतिनिधि पुना धामी, नेका वडा अध्यक्ष राजदिप लामा लगायत वक्ताहरुले मञ्चको स्थापनासँगै बराहक्षेत्रमा खेलकुद विशेषगरी फुटबलको स्तर उच्च बन्ने विश्वास व्यक्त गर्नुभयो।
यस मञ्चको सक्रियताले स्थानीय स्तरमा खेलकुदको जरो मजबुत बनाउने र भविष्यमा राष्ट्रियस्तरका खेलाडी उत्पादन गर्न मद्दत पुग्ने अपेक्षा गरिएको छ।