धरानमा २७२ युवा खेलाडीको परीक्षा, यू–१५ विश्वकप टोलीका लागि छनोट सुरु

सुनसरी । अजरबैजानमा हुने फिफा यू–१५ विश्वकप एन्ड फेस्टिभल २०२६ का लागि नेपाली टोली निर्माण प्रक्रिया कोशी प्रदेशको धरानबाट अघि बढेको छ । कोशी प्रदेशका ११ जिल्लाबाट आएका २७२ युवा खेलाडी अहिले प्रदेशस्तरीय छनोटमा प्रतिस्पर्धा गरिरहेका छन् ।

धरानस्थित एन्फा एकेडेमीमा शनिबारदेखि छनोट सुरु भएको हो । प्रतियोगिता आइतबारसम्म सञ्चालन हुनेछ ।
जिल्लास्तरीय छनोट पार गरेर आएका खेलाडीले धरानमा आफ्नो फुटबल कौशल र शारीरिक क्षमता प्रदर्शन गर्नेछन् । प्रदेशस्तरीय छनोटमा उत्कृष्ट ठहरिएका खेलाडीलाई अन्तिम छनोटका लागि काठमाडौं पठाइनेछ ।

कोशी प्रदेश फुटबल संघका अध्यक्ष किशोर राईका अनुसार राष्ट्रिय टोलीमा स्थान बनाउने लक्ष्यसहित खेलाडीहरू छनोटमा सहभागी भएका छन् । कोशी प्रदेशअन्तर्गत सुनसरी, मोरङ, झापा, इलाम, पाँचथर, ताप्लेजुङ, संखुवासभा, धनकुटा, उदयपुर, खोटाङ र भोजपुरका खेलाडी छनोटमा सहभागी छन् ।

अखिल नेपाल फुटबल संघ (एन्फा) ले देशका ४९ जिल्लामा खुला छनोट कार्यक्रम सञ्चालन गरेको थियो । जिल्लास्तरबाट उत्कृष्ट बनेका खेलाडीलाई प्रदेशस्तरीय छनोटका लागि पठाइएको हो । देशभर करिब पाँच हजार युवा खेलाडीले जिल्ला छनोटमा सहभागिता जनाएको एन्फाले जनाएको छ । स्थानीय तह र जिल्लामा रहेका प्रतिभावान खेलाडीको पहिचान गरी राष्ट्रिय टोली निर्माण गर्ने उद्देश्यले खुला छनोट कार्यक्रम सञ्चालन गरिएको हो ।

प्रदेशस्तरबाट छनोट भएका खेलाडीले काठमाडौंमा हुने केन्द्रीय छनोटमा प्रतिस्पर्धा गर्नेछन् । केन्द्रीय छनोटबाट करिब ३० देखि ३५ खेलाडी बन्द प्रशिक्षणका लागि छानिनेछन् । त्यसपछि अन्तिम १४ सदस्यीय नेपाली टोली तय हुनेछ।

फिफा यू–१५ विश्वकप एन्ड फेस्टिभल २०२६ आगामी अक्टोबर २२ देखि ३१ सम्म अजरबैजानमा आयोजना हुँदैछ । प्रतियोगितामा आठ–आठ खेलाडी मैदानमा खेल्नेछन् । प्रत्येक टोलीले बढीमा १४ खेलाडी दर्ता गर्न पाउने व्यवस्था छ ।