विराटनगरमा एशियन पेन्ट्स यू–१८ फुटबलको ट्रफी अनावरण

विराटनगर । एशियन पेन्ट्स यू–१८ फुटबल प्रतियोगिताको ट्रफी विराटनगरमा अनावरण गरिएको छ । विराटनगरस्थित विकेभिएम स्कुलमा आयोजित कार्यक्रममा ट्रफी अनावरणपछि नगर परिक्रमा गराइएको हो ।

ट्रफीलाई महेन्द्र चोक हुँदै करगाछीबाट सहिद रंगशालासम्म पुर्‍याइएको थियो । प्रतियोगिताको ट्रफी देशका सातवटै प्रदेशका राजधानीमा परिक्रमा गराइने आयोजकले जनाएको छ ।
कार्यक्रमको सभापतित्व कोशी प्रदेश खेलकुद विकास संघका उपाध्यक्ष बसन्त अर्यालले गरेका थिए । विकेभिएम स्कुलका प्रधानाध्यापक रविन दाहाल प्रमुख अतिथि थिए ।

आयोजकका अनुसार एशियन पेन्ट्स यू–१८ फुटबल प्रतियोगितामा देशभरका दुई हजार दुई सयभन्दा बढी विद्यालयका विद्यार्थी खेलाडी सहभागी छन् । विद्यालय तहमा रहेका प्रतिभावान् खेलाडीलाई आफ्नो क्षमता प्रदर्शन गर्ने अवसर प्रदान गर्नुका साथै उनीहरूलाई राष्ट्रियस्तरको प्रतियोगितासम्म पुग्ने अवसर सिर्जना गर्ने उद्देश्यले प्रतियोगिता आयोजना गरिएको हो ।

ट्रफीलाई सातै प्रदेशका राजधानीमा पुर्‍याएर विद्यालय तहको फुटबलप्रति विद्यार्थी तथा अभिभावकको आकर्षण बढाउने र युवा खेलाडीको प्रतिभा पहिचान गर्ने आयोजकको अपेक्षा छ ।