विष्णुपादुकामा पहिलो पटक महिला फुटबल प्रतियोगिता हुँदै, ए डिभिजन खेलाडी सहभागी हुने

धरान । महिला फुटबल क्लब धरान-२०, विष्णुपादुकाको संयोजनमा 'धरान-२० प्रथम महिला नकआउट खुल्ला फुटबल प्रतियोगिता, २०८३' आयोजना हुने भएको छ । 

शुक्रबार धरानमा पत्रकार सम्मेलन गर्दै आयोजक विष्णु सांस्कृतिक युवा क्लबले असोज २४ गतेदेखि आयोजना हुने प्रतियोगितामा आयोजकसहित ८ टिम सहभागी हुने जानकारी दिएको छ ।

प्रतियोगितामा आयोजक विष्णुपादुका महिला फुटबल क्लब, धरान-२०, भरौल न्युस्टार एकेडेमी, वराहक्षेत्र, तालतलैया फुटबल क्लब, इटहरी, भरौल बालमन्दिर फुटबल एकेडेमी, वराहक्षेत्र, राङ्चा फुटबल क्लब, केराबरी, धरान लेडिज फुटबल टिम, धरान, लेटाङ फुटबल क्लब, लेटाङ, रेवाहाङ फेयर फुटबल क्लब, धरान गरी ८ टिम सहभागी हुनेछन् । 

महिलाहरूको खेलमा समानता, महिलामा सक्षमता भन्ने नारासहित प्रतियोगिता आयोजना गर्न लागेको खेल संयोजक म्हारमेन्दो तामाङले बताइन् । 

खेलकुद प्रतियोगितालाई विष्णुपादुकाको विकाससँग जोड्ने क्लबका अध्यक्ष विजय लामाले बताए । उनले प्रतियोगिता र खेलकुद गतिविधिका बारेमा प्रचारप्रसार गर्न आग्रह गरे । मोरङ, सुनसरी, झापा गरी देशभरका विभिन्न स्थानबाट ए डिभिजन खेल खेलिसकेका महिला खेलाडीको सहभागिता रहने अध्यक्ष लामाले बताए ।

'२० नम्बर वडा धार्मिक पर्यटकीय क्षेत्रका रुपमा स्थापित भइरहेको अवस्थामा यी सम्भावनालाई खेलकुदसँग जोड्नुपर्ने अवस्था छ,' उनले भने, 'स्थानीय सरकार र तीनै तहका सरकारलाई ए डिभिजन खेल खेल्ने महिला खेलाडी विष्णुपादुकामा उत्पादन भइरहेका छन् भन्ने देखाउन चाहान्छौं ।'

ग्रामीण क्षेत्रमा प्रायोजक पाउन नसकिने अध्यक्ष लामाले गुनासो गरे । उनले प्रतियोगितालाई खेल क्षेत्रको विकासका लागि आन्दोलनका रुपमा अघि बढाएको बताए । उनले प्रतियोगिताले खेल मैदानको प्रवर्धन गर्ने र यसको विकासको मुद्दासमेत उठाउने बताए । 

ग्रामीण क्षेत्रमा महिला खेलाडीको आकर्षण भए पनि एकेडेमीको व्यवस्था, खेल सामग्री, तालिमको व्यवस्था नहुँदा ए डिभिजन खेल्ने महिला खेलाडी उत्पादन हुन नसकेको एडिभिजन खेलाडी प्रतीक्षा राईले बताइन् । 

नाइन ए साइड फुटबल प्रतियोगिता आगामी असोज २४ देखि ३१ गतेसम्म आयोजना हुनेछ । शिरिशे खेल मैदान, विष्णुपादुकामा आयोजना हुने प्रतियोगिताको मुख्य प्रायोजक- धरान उपमहानगरपालिका रहेको छ । धरान -२० नम्बर वडा कार्यालय प्रायोजक रहेको छ । प्रतियोगिताको सह प्रायोजन धरान- २, १०, १५, १८ वडा कार्यालयले गरेका छन् । 

प्रतियोगिताकै सन्दर्भमा मैत्रीपूर्ण भेट्रान फुटबल प्रतियोगितासमेत आयोजना हुने आयोजकले जनाएको छ ।