हिबिस्कस स्कुलद्वारा खुला हाजिरी जवाफ प्रतियोगिता

धरान–१५ स्थित हिबिस्कस इङ्ग्लिस बोर्डिङ स्कुलले यस वर्ष खुला हाजिरी जवाफ प्रतियोगिताको आयोजना गर्ने भएको छ । विगत तीन वर्षदेखि हिबिस्कस क्विज मेनिया नामक प्रतिस्पर्धा गर्दै आएको स्कुलले यस पटक नगर वा जिल्ला स्तरमा सीमित नराखी खुला स्तरमै आयोजना गर्न लागेको हो ।

शुक्रवार पत्रकार सम्मेलन गर्दै स्कुलका सल्लाहकार पवन झाले विद्यार्थीहरूको बौद्धिक क्षमता विस्तार गर्ने उद्देश्यले प्रतियोगिता खुला रुपमा ल्याइएको जानकारी दिनुभयो । उहाँले भने, “लोकसेवा आयोग जस्तै स्तरको प्रश्नावली तयार गर्ने भएकाले यसबाट विद्यार्थीको ज्ञानको दायरा थप फराकिलो हुनेछ ।”

यस पटक प्रतियोगिता दुई चरणमा सम्पन्न हुनेछ । पहिलो चरणमा १०० वटा लिखित प्रश्न दिइनेछन्, जसको अंकभार एक-एक रहनेछ । लिखित चरणबाट उत्कृष्ट ठहरिने शीर्ष ६ टिमले फाइनलमा प्रवेश पाउनेछन् ।
प्रतियोगिता सञ्चालनका लागि शिक्षक सुवास मोक्तानको संयोजकत्वमा समिति गठन गरिएको छ । समितिमा विकास साह सहसंयोजक, नयनराज राई जनसम्पर्क संयोजक, र मनिष श्रेष्ठ प्राविधिक संयोजक रहनु भएको स्कुलका निर्देशक गंगाराम राईले जानकारी दिनुभयो ।

आकर्षक पुरस्कार

कार्यक्रम संयोजक सुवास मोक्तानका अनुसार यसपटक १५० भन्दा बढी विद्यालयले सहभागिता जनाउने अपेक्षा गरिएको छ । विजेतालाई यसप्रकार पुरस्कार प्रदान गरिनेछः
• प्रथम: नगद रु. २०,०००, रनिङ ट्रफि, मेडल र प्रमाणपत्र
• द्वितीय: नगद रु. १५,०००, मेडल र प्रमाणपत्र
• तेस्रो: नगद रु. ८,०००, मेडल र प्रमाणपत्र
• चौथो: नगद रु. ६,००० र प्रमाणपत्र
• पाँचौं: नगद रु. ४,००० र प्रमाणपत्र
• सान्त्वना: नगद रु. २,००० र प्रमाणपत्र
गत वर्षको तुलनामा प्रथम पुरस्कारमा वृद्धी गरिएको पनि निर्देशक राईले उल्लेख गर्नुभयो ।

आगामी माघमा फाइनल

प्रतियोगिता आगामी पुष ९ र १० गते स्कुल परिसरमै आयोजना हुनेछ । पहिलो दिन प्रारम्भिक चरण सञ्चालन हुनेछ भने दोस्रो दिन शीर्ष ६ टिमबीच रोचक प्रतिस्पर्धा हुने स्कुलले जनाएको छ ।
२०७९ सालबाट सुरु भएको यस प्रतियोगितामा पहिलो विजेता हिबिस्कस स्कुल आफैं बनेको थियो । दोस्रो वर्ष नेपाल प्रहरी स्कुलले उपाधि जितेको थियो भने गत वर्ष पुनः हिबिस्कस स्कुल नै विजेता बनेको थियो ।