धरानको 'के के इन्टरनेश्नल' नामक विवादित विद्यालयको भिडिओ भाइरल 

धरान । धरानको एउटा विवादित निजी स्कुलका प्रधानाध्यापकले 'बच्चा पढाउन नसक्ने मुलाले किन जन्माउनु ?' भनेपछि सामाजिक सन्जालमा धरानको माहोल पुनः तात्तिएको छ । 

शिक्षक पदपूर्ति गर्न दबाब दिने उद्देश्यले विद्यार्थी आन्दोलनमा उत्रिएको धरानको 'फिनेल काण्ड' सेलाउन नपाउँदै शिक्षा क्षेत्रमा अर्को विवाद उत्पन्न भएको छ । राजनीति र विकृतिले गिजोलिएको धरानको शिक्षा क्षेत्रमा चर्को शुल्कको विवाद सार्वजनिक भिडिओले सतहमा ल्याएको छ । विद्यालयले मनपरि शुल्क लिएको आरोपमा एक अभिभावक धरान-१५ स्थित के के इन्टरनेश्नल स्कुल नामक विवादित विद्यालय पुगेका थिए । 

सार्वजनिक भिडिओ विद्यालयका अभिभावकले नै बनाएको देखिन्छ । भिडिओ सामाजिक सन्जालमा भाइरल बनेको छ । विद्यालयका प्रधानाध्यापक भनिएका उक्त व्यक्तिको तीव्र आलोचना भइरहेको छ । 

धरान-१५ स्थित के के इन्टरनेश्नल स्कुल नामक विवादित निजी विद्यालय चर्को शुल्कको लफडामा तानिएको छ । चर्को शुल्क लिएको र स्थानीय सरकारको नीति नियम नमानेको गुनासो गर्दै एक अभिभावकले बनाएको भिडिओमा प्रधानाध्यापक अराजक शैलीमा प्रस्तुत भएका छन् । 

भिडिओमा देखिएअनुसार अभिभावकसँग अमर्यादित रुपमा प्रस्तुत भएका प्रधानाध्यापक हरिश्चन्द्र बुढाथोकीले 'एउटा बच्चा पढाउन नसक्ने नादानीले नियम सिकाउने ?' भन्दै अभिभावकमाथि दागा धरेका छन् । 

सार्वजनिक झण्डै आठ मिनेटको भिडिओमा अभिभावकले नगरपालिकाको नियम नमान्ने ? मनपरि उठाउने पैसा ? भन्दै आक्रोश पोखेका छन् । भिडिओमा देखिएका प्रधानाध्यापक भनिएका उक्त व्यक्तिले 'कसले मनपरि उठायो ? अरुलाई मनपरि नहुने तपाईंलाई मनपरि हुने ?' भन्दै प्रतिवाद गरेका छन् । उनले 'एउटा आफ्नो बच्चाको फी तिरेर पढाउन नसक्ने मुलाले ठूल्ठूला कुरा गर्ने ? हामीलाई सिकाउने ?' भन्दै अभिभावकमाथि जाइलागेको देखिन्छ । 

भिडिओ खिच्ने अभिभावकले 'शिक्षामा लुटतन्त्र मच्चाउने ?' भन्दै प्रश्न गरेका छन् । उनको प्रश्न खस्न नपाउँदै प्रअले 'एउटा बच्चा पढाउन नसक्ने नादानीले बच्चा किन पाउनु? बच्चा किन जन्माउनु? किन जन्माउनु ?' भन्दै बारम्बार उक्त शब्द दोहोर्‍याएका छन् । 

उनले भनेका छन्, 'यो स्कुलले फ्रीमा पढाइदिन्छु भनेर ठेक्का लिएको हो ? बच्चा पढाउने हो भने पैसा तिर्नुस् हैन भने झिकेर लानुस् ।'

यसअघि समेत विभिन्न विवादमा पर्दै आएको के के इन्टरनेश्नल स्कुलको 'इन्टरनेश्नल' हुने मापदण्ड समेत खोजीको विषय बनेको सामाजिक सञ्जाल प्रयोगकर्ताहरुले टिप्पणी गरेका छन् । 

रास्वपाकी नेता तथा सामाजिक अभियान्ता शरीन तामाङले सामाजिक सञ्जालमा भनेकी छन्,'हरेक वर्ष के के इन्टरनेश्नल स्कुलको विवाद सञ्जालमा आउनु को कारण केहो ? एउटा जिम्मेवारी पद सम्हालेका व्यक्तिको बोली केहो त्यस्तो ? बच्चा जन्माउनेले एउटा बच्चा पढाउन नसक्ने मु... रे ? गत साल एउटा बालकलाई जातीय विभेद कहिले दुर्व्यवहार ?'

अभियान्ता तामाङले विवादित यो विद्यालयका अघिल्ला विवादास्पद घटनाहरुसमेत उल्लेख गर्दै प्रधानाध्यापक जस्ता व्यक्ति गैरजिम्मेवार हुनु दु:खद भएको उल्लेख गरेका छन् । सामाजिक सञ्जालमा टिप्पणी गर्दै प्रयोगकर्ताहरुले 'स्कुल फी तिरेन भनेर बच्चालाई मानसिक यातना दिने सबै स्कुलहरुलाई कारबाही हुनुपर्ने मत राखेका छन् ।
उनीहरुले प्रधानाध्यापकको बोली व्यवहार शैली एकदमै असभ्य र निच खालको रहेको र  दादागिरीको शैलीमा अभिभावकलाई थर्काएको उल्लेख गरेका छन् । प्रअको अभिव्यक्ति गलत र उनको  व्यक्तित्व र व्यवहार पटक्कै नसुहाउने बताएका छन् । 

२०८० भदौ २० गते यसै विद्यालयका अध्यक्ष यौन दुर्व्यवहारको मुद्दामा पक्राउ परेका थिए । सञ्चालक समितिका तत्कालीन अध्यक्ष प्रवीण अग्रवालमाथि  विद्यालयमा अध्ययनरत १२ वर्षीय बालिकालाई यौन दुर्व्यवहार गरेको आरोप लागेको थियो । २०७४ सालमा बसले किचेर एक बालकको मृत्यु भएको घटनामा समेत विद्यालय विवादित बनेको थियो । गत वर्ष एक मधेसी समुदायको बालक विद्यालय हाताभित्र जातीय दुर्व्यवहारमा पर्दा तीव्र विवाद उत्पन्न भएको थियो । विद्यालयको र्‍यागिङमा विद्यार्थीको खुट्टा तीन ठाउँमा भाँचिएको थियो ।