शिक्षक नियुक्तिको माग गर्दै धरानमा विद्यार्थी आन्दोलित, नगरप्रमुखको कार्यकक्षमा ताला

धरान । शिक्षक नियुक्तिको माग गर्दै धरानका दुई सामुदायिक विद्यालयका विद्यार्थीले कार्यवाहक नगर प्रमुख अइन्द्रविक्रम बेघाको कार्यकक्षमा तालाबन्दी गरेका छन् ।

धरान–११ स्थित ज्ञानोदय माध्यमिक विद्यालय र धरान–६ स्थित सरस्वती माध्यमिक विद्यालयका कक्षा १० मा अध्ययनरत विद्यार्थीले बिहीबार नगर प्रमुखको कार्यकक्षमा तालाबन्दी गरेका हुन् ।

शिक्षक पदपूर्तिका लागि पटक–पटक ध्यानाकर्षण गराउँदा पनि नगरपालिकाले बेवास्ता गरेको विद्यार्थीको आरोप छ । समस्या समाधानका लागि वार्तामा नबोलाएसम्म तालाबन्दी जारी राख्ने उनीहरूले बताएका छन् । तालाबन्दीअघि विद्यार्थीले नगरपालिकाको मुख्य गेटअगाडि घेराउ गरेका थिए ।

दुवै विद्यालयमा लामो समयदेखि शिक्षक पद रिक्त रहेकाले पठनपाठन प्रभावित भएको विद्यालय पक्षको भनाइ छ । विशेषगरी एसईईको तयारीमा रहेका कक्षा १० का विद्यार्थी प्रभावित भएका छन् ।

सरस्वती माविमा सामाजिक शिक्षक र लेखापाल रिक्त

धरान–६ स्थित सरस्वती माविमा सामाजिक विषयको शिक्षक पद करिब आठ महिनादेखि रिक्त छ । तत्कालीन प्रधानाध्यापक गंगाप्रसाद धमला गत माघ २० गते अनिवार्य अवकाशमा गएपछि उक्त पद खाली भएको प्रधानाध्यापक होमनाथ दाहालले बताएका छन् ।

विद्यालयले रिक्त पदमा विज्ञापन खोल्न नगरपालिकासँग अनुमति मागे पनि अनुमति नपाएको जनाएको छ । शिक्षक अभावमा अन्य शिक्षकले नियमित कक्षासँगै सामाजिक विषय पढाउनुपरेको दाहालले बताएका छन् ।

विद्यालयमा लेखापालको पदसमेत रिक्त छ । लेखापाल चित्रबहादुर कार्की अवकाश भएपछि जेठ १ गतेदेखि पद खाली रहेको विद्यालयले जनाएको छ । व्यवस्थापन समितिले विज्ञापन गरी आवेदन संकलन गरे पनि परीक्षा र नियुक्ति प्रक्रिया अघि बढ्न सकेको छैन ।

ज्ञानोदय माविमा पनि शिक्षक पदपूर्ति हुन सकेन

धरान–११ स्थित ज्ञानोदय माविमा पनि रिक्त शिक्षक पदपूर्ति हुन सकेको छैन । शिक्षक अभावका कारण विद्यार्थीको पढाइ प्रभावित भएको भन्दै विद्यालयले पदपूर्तिका लागि पहल गर्दै आएको छ ।

दुवै विद्यालयका विद्यार्थीले आफूहरूको पढाइ र भविष्यसँग जोडिएको विषयमा नगरपालिकाले गम्भीरता देखाउनुपर्ने माग गरेका छन् ।

शिक्षक नियुक्ति नगरपालिकाले जानाजानी रोकेको आरोप भने कार्यवाहक नगर प्रमुख बेघाले अस्वीकार गर्दै आएका छन् । भदौ ९ गते वडा कार्यालयमा आयोजित पत्रकार सम्मेलनमा उनले विद्यालय व्यवस्थापन समितिका अध्यक्ष र प्रधानाध्यापकबीचको विवादका कारण समस्या समाधान हुन नसकेको बताएका थिए ।

समिति र प्रधानाध्यापकबीच समन्वय हुन नसक्दा बैठकसमेत सहज रूपमा बस्न नसकेको उनको भनाइ छ । आफूले दुवै पक्षलाई बोलाएर पटक–पटक छलफल गराएको उनको दाबी छ ।

नगरपालिकाले रिक्त पदमा नियमअनुसार सार्वजनिक सूचना जारी गरी योग्य व्यक्ति छनोट गर्नुपर्ने बताउँदै आएको छ । विद्यालयभित्रको आन्तरिक विवाद समाधान गरेर शिक्षक नियुक्तिको प्रक्रिया अघि बढाउनुपर्ने बेघाको भनाइ छ ।
विद्यालय पक्षले भने शिक्षक अभावका कारण पठनपाठन प्रभावित भएकाले तत्काल पदपूर्ति गर्नुपर्ने माग गर्दै आएको छ ।