प्राइम भिजन इन्टरनेशनल कलेजका विद्यार्थीलाई विपद् व्यवस्थापन तालिम

धरान । विपद्का बेला उद्धार तथा पूर्वतयारीका लागि सक्षम बनाउने उद्देश्यले प्राइम भिजन इन्टरनेश्नल कलेजका विद्यार्थीलाई तीन दिने विपद् व्यवस्थापन तालिम प्रदान गरिएको छ ।  

असोज १६ देखि १८ गतेसम्म सञ्चालित तालिममा ३२ जना विद्यार्थीले आगलागी नियन्त्रण, भूकम्पका बेला खोज तथा उद्धार, प्राथमिक उपचार, पौडी तथा लाइफगार्ड सीप र पानीमा डुबेकाको उद्धारसम्बन्धी सैद्धान्तिक तथा व्यावहारिक अभ्यास गराइएको थियो ।

धरान जुनियर जेसीजको आयोजनामा भएको विद्यार्थीलक्षित विपद व्यवस्थापन तालिमलाई मुख्य प्रशिक्षक सशस्त्र प्रहरी बल धरान बेसका सशस्त्र प्रहरी नायब उपरीक्षक (डीएसपी) युकेश उप्रेतीले सहजीकरण गरेका थिए । उनलाई सशस्त्र प्रहरी बल चतरा बेस क्याम्पका इन्स्पेक्टर मेघराज राउत नेतृत्वको टोलीले सहयोग गरेको थियो ।

कलेज तहबाट यस प्रकारको विपद् व्यवस्थापन तालिम आयोजना गरिएको पहिलो पटक भएको डिएसपी उप्रेतीले बताए । 

तालिममा सहभागी विद्यार्थी महिमा राईले तालिम सैद्धान्तिकसँगै व्यावहारिक र जीवनोपयोगी रहेको अनुभव सुनाइन्  ।प्राइमभिजन इन्टरनेश्नल कलेजका अध्यक्ष अनिल श्रेष्ठले सशस्त्र प्रहरीको प्रशिक्षक टोली र धरान जुनियर जेसीजलाई धन्यवाद दिँदै विद्यार्थीको सुरक्षा र हितलाई ध्यानमा राखेर आगामी दिनमा पनि यस्ता तालिमलाई निरन्तरता दिने बताए ।

तालिमको समापन चतरास्थित बेलका बीच रिसोर्टमा गरिएको थियो । समापन कार्यक्रममा तालिम पूरा गर्ने विद्यार्थी तथा बुटक्याम्पर्सलाई प्रमाणपत्र वितरण गरिएको थियो ।