धरानमा बैंकहरूद्वारा "ग्लोबल मनी वीक २०२५" अन्तर्गत वित्तीय साक्षरता र्‍याली आयोजन

रमेश हतुवाली

धरान, २१ मार्च २०२५ – 
धरानका विभिन्न बैंक तथा वित्तीय संस्थाहरूले संयुक्त रूपमा ग्लोबल मनी वीक २०२५ को अवसरमा वित्तीय साक्षरतासम्बन्धी र्‍याली आयोजना गरेका छन्। "Think before you follow, wise money tomorrow" नाराका साथ गरिएको र्‍यालीमा बैंकका कर्मचारी, वित्तीय जानकारहरू तथा सर्वसाधारणको उल्लेख्य उपस्थिति रहेको थियो।

र्‍यालीमा सहभागीहरूले वित्तीय व्यवस्थापन, बचतको महत्त्व, स्मार्ट लगानी, र डिजिटल बैंकिङ्गको प्रयोग जस्ता विषयहरूमा जनचेतना फैलाउने उद्देश्यसहित प्लेकार्डहरू बोकेका थिए। सिद्धार्थ बैंक, ज्योति विकास बैंक, लगायतका बैंक तथा वित्तीय संस्थाहरूले संयुक्त रूपमा यो कार्यक्रम अघि बढाएका हुन्।

बैंक प्रतिनिधिहरूका अनुसार, ग्लोबल मनी वीक अभियानले विशेषगरी युवाहरूलाई आर्थिक निर्णयहरू सचेत रूपमा गर्न सिकाउने उद्देश्य राखेको छ। कार्यक्रममा बोल्दै एक बैंक अधिकारीले भने, "वित्तीय साक्षरता हरेक व्यक्तिको लागि आवश्यक छ। सही तरिकाले बचत गर्न, लगानी गर्न, र भविष्यका लागि आर्थिक योजना बनाउन यस्ता कार्यक्रमहरू महत्त्वपूर्ण छन्।"

कार्यक्रम आगामी मार्च २३ सम्म विभिन्न वित्तीय सचेतनामूलक गतिविधिहरू सहित सञ्चालन गरिनेछ। आयोजकहरूले धरानका स्थानीय बासिन्दालाई पनि यस अभियानमा सहभागी भई आफ्नो आर्थिक ज्ञान बढाउन आग्रह गरेका छन्।