असोज २५ देखि ‘विराट सडक महोत्सव’ आयोजना हुँदै

विराटनगर । बडादसैँको अवसरमा विराटनगरको हिमालय रोडमा ‘विराट सडक महोत्सव–२०८३’ आयोजना हुने भएको छ ।

विराटनगर महानगरपालिकाको मुख्य प्रवर्द्धन तथा मन्जिना मुभिज क्रिएसन प्रालिको आयोजनामा असोज २५ देखि ३० गतेसम्म महोत्सवको छैटौँ संस्करण आयोजना हुन लागेको हो ।

आयोजक संस्थाले सोमबार विराटनगरमा पत्रकार सम्मेलन गर्दै महोत्सवबारे जानकारी दिएको छ । दसैँको माहोलमा आन्तरिक तथा बाह्य पर्यटक, स्थानीय बासिन्दा र युवापुस्तालाई एकै थलोमा मनोरञ्जन, मौलिक खानपान, कला, संस्कृति र संगीतको अनुभव गराउने उद्देश्यले महोत्सव आयोजना गर्न लागिएको मन्जिना मुभिज क्रिएसन प्रालिका निर्देशक जतिन ताम्राकारले बताए ।

महोत्सवमार्फत आन्तरिक पर्यटन प्रवर्द्धन, विराटनगरको सांस्कृतिक पहिचानको प्रचार, स्थानीय उत्पादनको बजारीकरण तथा स्थानीय कलाकारलाई मञ्च प्रदान गर्ने अपेक्षा गरिएको छ । ‘स्वाद, संगीत र संस्कृतिको महासंगम’ मूल नारासहित आयोजना हुने महोत्सवमा सर्वसाधारणका लागि प्रवेश निःशुल्क गरिएको छ ।

महोत्सवमा विभिन्न जातजाति तथा समुदायका मौलिक ३० भन्दा बढी परिकारका स्टल, स्थानीय उत्पादन तथा व्यवसायको प्रदर्शनी, स्थानीयदेखि राष्ट्रिय स्तरसम्मका कलाकारको सांगीतिक तथा सांस्कृतिक प्रस्तुति र दसैँ विशेष मनोरञ्जनात्मक कार्यक्रम मुख्य आकर्षणका रूपमा रहनेछन् ।

महोत्सव प्रत्येक दिन दिउँसो ३ बजेदेखि राति ९ बजेसम्म सञ्चालन हुनेछ । भीडभाड र सुरक्षालाई मध्यनजर गर्दै दिउँसो २ बजेदेखि हिमालय रोड क्षेत्रमा सवारी आवागमन बन्द गरिने भएको छ ।

सवारी आवागमनलाई सहज बनाउन नजिकका वैकल्पिक बाइपास सडक प्रयोग गरिने र त्यसका लागि सम्बन्धित निकायसँग समन्वय भइसकेको आयोजकले जनाएको छ । यद्यपि, सो क्षेत्रमा रहेका बैंक, वित्तीय संस्था, सहकारी तथा एम्बुलेन्सलगायत अत्यावश्यक सेवाका सवारीसाधनलाई निर्वाध आवागमनको व्यवस्था मिलाइने निर्देशक ताम्राकारले जानकारी दिए ।