धरान–८ का आगलागी पीडित चार परिवारलाई होप धरानको राहत सहयोग

धरान, असोज २० — हालै धरान–८ स्थित सभागृह मार्गमा लागेको आगलागीमा सर्वस्व गुमाएका चार परिवारलाई होप धरानले राहत सहयोग प्रदान गरेको छ।

सोमबार आयोजित कार्यक्रममा राहत वितरण धरान–८ का वडा अध्यक्ष धनबहादुर राईको प्रमुख आतिथ्यतामा सम्पन्न भएको हो। उहाँले पीडित परिवारहरूलाई खाद्यान्न, ओढ्ने–ओछ्याउने

सामग्रीलगायतका राहत वस्तु हस्तान्तरण गर्नुभयो। राहत पाउने परिवारहरूमा बिमला कार्की, बिरेन्द्र सुब्बा, सीता घिमिरे र भोगेन्द्र श्रेष्ठ रहेका छन्।
कार्यक्रमका अवसरमा होप धरानका अध्यक्ष निश्चल पलिखेले पहिलो चरणमा विभिन्न सहयोगी दाताबाट संकलित सामग्री वितरण गरिएको र आगामी दिनमा थप राहत तथा पुनःस्थापनाका पहलहरू अघि बढाइने जानकारी दिनुभयो।

वडा अध्यक्ष राईले विपत्तिका घडीमा एकआपसमा सहयोग र एकता आवश्यक हुने उल्लेख गर्दै समाजका सबै पक्षले संवेदनशील भई पीडितहरूलाई सम्भव सहयोग गर्न आग्रह गर्नुभयो।
गत असोज १५ गते राति भएको आगलागीमा एउटै घरमा भाडामा बस्दै आएका चारै परिवार विस्थापित भएका थिए। आगोले घरका सबै सरसामान जलेर पूर्णरूपमा नष्ट भएका थिए।