धरानमा पहिलो धरान सिटी नकआउट रनिङ कप फुटबल हुने, विजेतालाई १ लाख पुरस्कार

धरान, असोज २५ — धरान सिटी फुटबल क्लब प्रा.लि.को आयोजनामा पहिलो पटक धरान सिटी नकआउट रनिङ कप फुटबल प्रतियोगिता–२०८२ यही कार्तिक २२ गतेदेखि २९ गतेसम्म धरान रंगशालामा हुने भएको छ। क्लबले शनिबार पत्रकार महासंघ सुनसरी कार्यलय धरान–१३ अमरहाटमा आयोजित पत्रकार सम्मेलनमार्फत सो जानकारी दिएको हो।
यसअघि प्रतियोगिता ०८२ भदौ २८ गतेदेखि असोज ४ गतेसम्म सञ्चालन गर्ने तय भए पनि देशको विषम परिस्थितिका कारण स्थगित गरिएको आयोजकले जनाएको छ। अब प्रतियोगिता पुनः निर्धारित मितिमा हुने भएको छ।
प्रतियोगिताका विजेताले नगद रु. १ लाख, उपविजेताले रु. ५० हजार, उत्कृष्ट खेलाडीले रु. ५ हजार, अन्य व्यक्तिगत पुरस्कार विजेताले रु. ३ हजार, र म्यान अफ द म्याचले रु. १ हजार ५ सय, साथै ट्रफी, मेडल र प्रमाणपत्र प्राप्त गर्नेछन्।
धरान सिटी फुटबल क्लबका अध्यक्ष विवेक राईका अनुसार प्रतियोगिताले धरानका युवा खेलाडीहरूलाई आफ्नो प्रतिभा देखाउने अवसर दिनेछ र स्थानीय स्तरमा खेलकुदको विकासमा टेवा पुर्‍याउनेछ। उनले सम्पूर्ण खेलप्रेमी, सरोकारवाला तथा समर्थकहरूलाई खेल हेर्न र प्रतियोगिता सफल बनाउन सक्रिय सहभागिता जनाउन आग्रह गरेका छन्।