"राज्यसँग हिसाब–किताब गर्ने बेला आएको छ : सञ्चारकर्मी जीवन बिष्ट"

सञ्चारकर्मी जीवन बिष्ट ले दृष्टिविहीन तथा फरक क्षमता भएका व्यक्तिहरूका हक–अधिकारका मागसहित सिंहदरबार जाने तयारी गरेको बताएका छन्। उनले सामाजिक सञ्जालमार्फत एक विस्तृत १५ बुँदे मागपत्र सार्वजनिक गर्दै, राज्यले दृष्टिविहीन तथा अपाङ्गता भएका व्यक्तिहरूका वास्तविक समस्या र क्षमतालाई सम्बोधन गर्न आवश्यक नीति र कार्यक्रम तुरुन्तै ल्याउनुपर्ने माग गरेका हुन्।
बिष्टका अनुसार, “सडकमा स्थानीय कुकुरहरूको व्यवस्थापन भइसकेको छ, तर दृष्टिविहीन र फरक क्षमता भएका व्यक्तिहरूको संख्या बढ्दो छ। देशमा जति परिवर्तन आए पनि हामीलाई मान्छे भएर बाँच्न गाह्रो भइरहेको छ। अब राज्यसँग हिसाब–किताब गर्नुपर्ने बेला आएको छ।”
उनी हाल काठमाडौंमा रहेर यी मागहरू लिएर सिंहदरबार जाने तयारीमा छन्। उनका अनुसार, राज्यले सामाजिक सुरक्षा भत्ताको रूपमा वार्षिक ठूलो रकम वितरण गर्दै आएको भए पनि, दृष्टिविहीन र फरक क्षमता भएका व्यक्तिहरूलाई सीप र योग्यता अनुसार प्रत्यक्ष रोजगारीमा जोड्न सके उनीहरू राज्यका लागि बोझ नभई योगदानकर्ता बन्न सक्छन्।
बिष्टले राज्यका लागि प्रस्तुत गरेका मुख्य मागहरूमा बिना धितो ० प्रतिशत ब्याजमा २५ लाख रुपैयाँसम्म ऋण उपलब्ध गराउने, पशुपतिनाथलगायत मठ–मन्दिरमा व्यवसायिक अवसर दिने, सरकारी टेन्डरमा दृष्टिविहीन परिवारलाई प्राथमिकता दिने, गजल तथा दोहोरी क्षेत्रमा काम गर्ने दृष्टिविहीनहरूका लागि रोजगार सुरक्षा र पेन्सनको व्यवस्था गर्ने, तथा सेयर बजारमा १० प्रतिशत कोटा निर्धारण गर्ने लगायतका बुँदाहरू छन्।
त्यस्तै, उनले सरकारी सञ्चार माध्यम, टेलिकम, हुलाक लगायतका क्षेत्रमा २० प्रतिशत दृष्टिविहीन र अपाङ्गता भएका व्यक्तिहरूलाई रोजगार दिने व्यवस्था, उपचारमा शुल्क छुट, शिक्षामा विशेष कोटा, अपाङ्गता वर्गीकरण पुनरावलोकन, र कानुनी सहायता र सुरक्षाका लागि कडा व्यवस्था गर्न पनि माग गरेका छन्।
उनको मागपत्रमा थप रूपमा, सार्वजनिक यातायात तथा हवाई यात्रामा ५० प्रतिशत छुट, सवारीसाधनमा भन्सार छुट, खेलकुद सङ्घ दर्ता प्रणालीमा लचकता, र अपाङ्गता सम्बन्धी संघ–संस्थाको आर्थिक सुशासनमा निगरानी जस्ता विषयहरू समेत समावेश छन्।
बिष्टका अनुसार, यी मागहरू कार्यान्वयन हुन सकेमा दृष्टिविहीन तथा फरक क्षमता भएका व्यक्तिहरू आत्मनिर्भर र उत्पादक नागरिकका रूपमा अगाडि बढ्न सक्ने छन्। उनले सरकारलाई शीघ्र संवाद र ठोस कदम चाल्न आह्वान गरेका छन्।