धरानको जंगलमा हराइरहेकी महिलाको शव फेला

धरान, मंसिर — धरान उपमहानगरपालिका–४ स्थित जङ्गलको खोल्सामा एक महिलाको मृत शव फेला परेको छ। कार्तिक २४ गते बिहान घरबाट निस्किएपछि बेपत्ता भएकी ती महिलाको शव जङ्गलको जाडिको खोल्सामा घोप्टो अवस्थामै भेटिएको इलाका प्रहरी कार्यालय धरानका प्रमुख डीएसपी भीषण बाबु राईले जानकारी दिए।
उनका अनुसार शव भेटिएको अवस्था र स्थानले घटनालाई शंकास्पद बनाएको छ। बेपत्ता भएकी महिलाबारे परिवारले इलाका प्रहरी कार्यालय इटहरीमा निवेदन दिएका थिए।
खोजी क्रममा कार्तिक २७ गते धरान–४ बौद्ध विहार नजिकै कोशी लोकमार्ग छेउमा रातो लेगिज, स्विटर, कालो चप्पल, ब्याग र अन्य सामग्री भेटिएका थिए। ती सामग्रीको आधारमा थप खोजी गर्दा सोमबार दिउँसो करिब २ बजे शव फेला परेको प्रहरीले जनाएको छ।
डीएसपी राईका अनुसार शव फेला परेको सर्दु जलाधार क्षेत्र धरान बजारबाट करिब १३ किलोमिटर दूरीमा पर्छ। घटनास्थलको मुचुल्का उठाएर शवलाई पोष्टमार्टमका लागि बीपी कोइराला स्वास्थ्य विज्ञान प्रतिष्ठान, धरान पठाइएको छ।
शव पहिचान इटहरी उपमहानगरपालिका–२ की ३५ वर्षीया मञ्जु पौडेल (निरौला) का रूपमा खुलेको छ। उनका परिवारलाई शव बुझाइसकिएको प्रहरीले जनाएको छ।
घटनाबारे थप अनुसन्धान भइरहेको इलाका प्रहरी कार्यालय धरानले जानकारी दिएको छ।