फोकस–१६ क्लवद्वारा समाजसेवी प्रदेश राईलाई सम्मानसहित विदाई

धरान, ७ मंसिर । फोकस क्लव धरान–१६ ले आफ्नो सल्लाहकार तथा धनकुटा सेवा समाज दक्षिण कोरियाका अध्यक्ष समाजसेवी प्रदेश राईलाई विशेष कार्यक्रममार्फत सम्मानसहित विदाई गरेको छ। क्लवका सल्लाहकार लक्ष्मी याक्खालाई पनि सोही कार्यक्रममार्फत बिदाइ गरिएको क्लवले जनाएको छ।
समाजसेवी राईले विगत वर्षदेखि नै क्लवका विभिन्न गतिविधिमा निरन्तर सहयोग गर्दै आएका छन्। नेपाल आगमनको अवसरमा क्लवले उहाँको योगदानको कदर गर्दै सम्मानसमेत प्रदान गरेको हो। सफल व्यवसायीका रूपमा दक्षिण कोरियामा स्थापित राई फुटबल खेलको प्रवर्द्धन तथा समाजसेवामा समेत सक्रिय रूपमा लाग्दै आएका व्यक्ति हुन्।

क्लवका सचिव उमेश जिमीका अनुसार दक्षिण कोरियामा कार्यरत र अलपत्र परेका नेपालीहरूलाई विगत एक दशकदेखि सहयोग गर्दै आएका राईले फुटबललाई माध्यम बनाएर नेपालीहरूबीच आपसी भाईचारा मजबुत बनाउन महत्वपूर्ण भूमिका खेल्दै आएका छन्। “उहाँको योगदान प्रति कृतज्ञता व्यक्त गर्दै नेपालमा पनि खेलकुद क्षेत्र प्रवर्द्धन गर्न थप प्रेरणा मिलोस् भन्ने उद्देश्यले हामीले सम्मान गरेका हौँ,” जिमीले बताए।
सम्मान ग्रहण गर्दै सल्लाहकार राईले आफूलाई प्राप्त सम्मानले आगामी दिनमा सामाजिक कार्य र खेलकुद विकासमा अझ सक्रिय बन्न उत्साह मिलेको प्रतिक्रिया दिएका छन्।

कार्यक्रममा सल्लाहकार राई र सदस्य लक्ष्मी याक्खालाई क्लवका अध्यक्ष दिलिप भुजेल र उपाध्यक्ष मन्जु उदाशले मायाको चिनो प्रदान गर्दै औपचारिक रूपमा विदाई गरेका थिए। कार्यक्रममा धरान–१६ का जनप्रतिनिधि भिम सुव्वा, वडा नं–५ का सदस्य विजय राई, सल्लाहकार विकास मगर, देवराज अधिकारीलगायतको उपस्थिति रहेको थियो।