डिसिए कप–२०८२ : दुवै तर्फको उपाधि आयोजककै झोलीमा

धरान, २० मङ्सिर — देउराली चिल्ड्रेन एकेडेमी, धरान–५ द्वारा आयोजित ‘डिसिए कप–२०८२’ को दुवै उपाधि यही विद्यालयले हात पार्दै प्रतियोगितामा पूर्ण प्रभुत्व जमाएको छ। शुक्रवार सम्पन्न धरान–स्तरीय एकदिने बास्केटबल प्रतियोगितामा छात्र र छात्रा दुवै विधामा आयोजक टोली उत्कृष्ट प्रदर्शनका साथ विजेता बनेका हुन्।

छात्रतर्फ देउराली चिल्ड्रेन एकेडेमी धरान–५ ले विजेता बनेको थियो भने जोलसाया एकेडेमी धरान–११ उपविजेतामा सीमित भयो। यस्तै, छात्रातर्फ पनि आयोजक देउराली चिल्ड्रेन एकेडेमी नै च्याम्पियन बन्दै ‘डबल क्राउन’ हासिल गर्‍यो। छात्रातर्फ पनि जोलसाया एकेडेमी नै उपविजेता बन्यो।
प्रतियोगितामा धरानका ५ विद्यालयका १५ टिम सहभागी भएका थिए। हिविस्कस इंग्लिस बोर्डिङ स्कुल (धरान–१५), जोलसाया एकेडेमी (धरान–११), धरान इंग्लिस बोर्डिङ स्कुल (धरान–५), आवरहोम बोर्डिङ स्कुल (धरान–१९) र आयोजक देउराली चिल्ड्रेन एकेडेमी लगायतका टोलीले प्रतिस्पर्धा गरेका थिए।

विजयी टोली तथा खेलाडीहरूलाई प्रमुख अतिथि धरान–५ का वडाध्यक्ष मनप्रसाद लिम्बू, प्रिन्सिपल नविन गौतम, निर्देशक पृथ्वी राईका मगर लगायतका अतिथिले ट्रफी, मेडल र प्रमाणपत्र प्रदान गरेका थिए।
प्रिन्सिपल गौतमका अनुसार विद्यार्थीको शैक्षिक क्षमतासँगै खेलकुदमा पनि बराबरी उर्जा र प्रतिभा विकास गराउने उद्देश्यले प्रतियोगिताको आयोजना गरिएको हो। उनले आगामी वर्षहरूमा पनि यसलाई निरन्तरता दिने प्रतिबद्धता व्यक्त गरे।
त्यसैगरी, स्कुलका निर्देशक मगरले बास्केटबल जस्ता आकर्षक खेलहरूको विकास र विद्यार्थीको अभिरुचि पहिचान गर्न प्रतियोगिता महत्वपूर्ण आधार रहेको उल्लेख गरे।
कार्यक्रमको अध्यक्षता स्कुलका अध्यक्ष पूर्णप्रसाद लिम्बूले गर्नुभएको थियो।