ज्वाइँद्वारा सासुको हत्या, अभियुक्त पक्राउ

इटहरी, सुनसरी — इटहरी उपमहानगरपालिका–९ स्थित बीपी चोकमा ५६ वर्षीया पविमाया बयलकोटीको हत्या भएको छ। पविमायाको हत्या उनका ज्वाइँ ४० वर्षीय गणेश शाहा (गुप्ता) ले गरेको प्रहरीले जनाएको छ।

भोजपुरको दिङ्सोला नगरपालिका–१ स्थायी घर भई हाल इटहरीमा बस्दै आएकी बयलकोटीलाई सोमबार बिहान करिब ८ बजे घर नजिकै रहेको चलिरहेको कल (पानी तान्ने मेसिन) को डन्डी खोलेर टाउकोमा प्रहार गरिएको प्रहरीले जनाएको छ।

प्रहरीका अनुसार पविमाया छोरी–ज्वाइँको घरमा उपचारका लागि करिब एक हप्तादेखि बस्दै आएकी थिइन्। आइतबार राति घरायसी विवाद भएको र सोही विवादका कारण सोमबार बिहान ज्वाइँ शाहाले सासुमाथि कलको डन्डीले टाउकोमा प्रहार गरेका थिए।

गम्भीर घाइते भएकी बयलकोटीलाई उपचारका लागि विराट मेडिकल कलेज टिचिङ अस्पताल लगिएकोमा उपचारकै क्रममा उनको मृत्यु भएको प्रहरीले जनाएको छ।

घटनाको जानकारी पाउनासाथ प्रहरी घटनास्थलमा पुगेको थियो। प्रारम्भिक अनुसन्धानमा बसिरहेको अवस्थामा टाउकोमा प्रहार गरी हत्या गरिएको खुलेको इटहरी प्रहरीले जनाएको छ।

घटनापछि फरार रहेका अभियुक्त गणेश शाहा (गुप्ता) लाई खोजतलास गर्ने क्रममा सोमबार राति ११ बजेर ५५ मिनेटमा इटहरी–९ स्थित विराटनगर लाइनबाट प्रहरीले पक्राउ गरेको इटहरी प्रहरी कार्यालयले जनाएको छ।

घटनासम्बन्धी थप अनुसन्धान भइरहेको प्रहरीले बताएको छ