इटहरीमा गणेश इशारा राईको २०औँ एकल कमेडी शो सम्पन्न

धरान,५ माघ: इटहरी–४ स्थित दुर्गा पार्टी प्यालेसमा माघ ३ गते शनिबार “गणेश इशारा राई अल नेपाल २०औँ एकल कमेडी शो” भव्य रूपमा सम्पन्न भएको छ।
    बिरमाया राई (शोभोमा) स्मृति कोष निर्माण सहयोगार्थ आयोजना गरिएको उक्त कार्यक्रममा प्रमुख अतिथिका रूपमा असहाय बालबालिका आश्रम इटहरीकी अध्यक्ष तथा समाजसेवी गीता गौतम सहभागी हुनुहुन्थ्यो।
     गत दुई दशकभन्दा लामो समयदेखि हास्यव्यङ्ग विधामा सक्रिय कलाकार तथा सामाजिक अभियन्ता गणेश इशारा राईले स्थापना गरेको स्मृति कोषमार्फत भोजपुर, सुनसरी, झापा लगायतका जिल्लामा रहेका मुटुरोग, क्यान्सर, मृगौला लगायत गम्भीर रोगबाट पीडित तर आर्थिक अभावका कारण उपचार गराउन नसक्ने गरिब तथा असहाय व्यक्तिहरूलाई सहयोग गर्दै आउनुभएको छ।
कार्यक्रम सम्योजक नवीन राईका अनुसार सामाजिक सेवाको उद्देश्यले सबैसँग सहयोगको अपिल गरिए पनि अपेक्षाअनुसार सहयोग जुट्न नसकेको भए पनि यस्ता सामाजिक कार्य गर्न पाउँदा आत्मसन्तुष्टि मिल्ने बताउनुभयो।
कार्यक्रममा अग्रज गायक डिजराज पौडेलले ‘तिमी आउने बाटोमा फुल रोपिदिएँ, तिमी आएनौ…’ लगायतका चर्चित गीत प्रस्तुत गर्नुभयो। त्यसैगरी गायिका पार्वती राईले ‘खोटाङ हलेसी छुट्नै मन लाग्दैन, तिमीलाई भेटेसी…’ सहितका गीतहरू गाउनु भयो। साथै गङ्गा गौतम, सुनिता कटुवाल, सचिन राई लगायत कलाकारहरूले पनि आ–आफ्ना प्रस्तुति राखे।
हास्यकलाकार गणेश इशारा राईले नेताहरूको क्यारिकेचर तथा समसामयिक विषयवस्तुमा आधारित हास्यव्यङ्ग प्रस्तुत गर्दै दर्शकलाई भरपूर मनोरञ्जन प्रदान गर्नुभयो। कार्यक्रममा नृत्य प्रस्तुति समेत समावेश गरिएको थियो।
कार्यक्रममा सह–संयोजक रोहित चाम्लिङ, संरक्षक तथा सल्लाहकार अर्जुन शर्मा, सहयोगी दाताहरू, व्यवसायी, बुद्धिजीवी तथा सर्वसाधारणको उल्लेख्य उपस्थिति रहेको थियो।