प्रकाशपुरमा चौंथो पालुवा महोत्सव आयोजना हुँदै, कार्तिक २४ गते उद्घाटन

वराहक्षेत्र । वराहक्षेत्र-१० प्रकाशपुरमा चौंथो पालुवा महोत्सव-२०८३ सांस्कृतिक तथा देउसी भैलो कार्यक्रम आयोजना हुने भएको छ ।

द पालुवा एकेडेमी प्रकाशपुरको आयोजनामा नृत्य, गायन, प्रहसनसहितका सांस्कृतिक कार्यक्रम आयोजना हुने आइतबार प्रकाशपुरमा आयोजित पत्रकार सम्मेलनमा आयोजकले जानकारी गराएका छन् । 

द पालुवा एकेडेमीका अध्यक्ष जीवन कार्कीका अनुसार कार्तिक २४ गते महोत्सवको उद्घाटन गरिने छ । साँझ ६ बजेदेखि आयोजना हुने महोत्सव प्रकाशपुरस्थित दुर्गा मन्दिर प्राङ्गणमा हुनेछ । 

स्थानीय कलाकारहरूको साङ्गीतिक र सांस्कृतिक प्रस्तुति रहने कार्यक्रमका लागि एक महिनाअघिदेखि प्रशिक्षण गराइएको अध्यक्ष कार्कीले बताए । 

'नृत्य वाटिका डान्स एण्ड जुम्बा सेन्टरसँगको समन्वयमा बालबालिकालाई एक महिनादेखि प्रशिक्षित गराइँदैछ,' पत्रकार सम्मेलनमा अध्यक्ष कार्कीले भने, 'स्थानीय कलाकारको प्रतिभा प्रस्फुटन गराउने उद्देश्यले कार्यक्रम आयोजना गरिएको हो ।' 

महोत्सवको समापन कार्तिक २६ गते स्थानीय मङ्गलबारे चोकमा गरिने आयोजकले जनाएको छ ।  महोत्सवको अवलोकनका लागि आयोजकले नगरवासीलाई अनुरोध गरेको छ ।