'चौबिसमा मेन्छिन' को मिलियन भ्यूज उत्सव, पा:लाम साम्लोमाथि मन्थन

धरान । 'पा:लाम गाइन्छ, माया प्रेम बस्छ, बिहेबारी हुन्छ, अनि सृष्टिको सुरुवात हुन्छ,' पा:लाम अध्येता तथा सर्जक अम्विका सम्वाहाम्फेले भने, 'पा:लाम याक्थुङहरूको जीवन दर्शन हो, सृष्टिको आधार हो ।'  

आइतबार धरानमा पा:लाम सर्जकहरूले याक्थुङ संस्कृतिभित्रको सौन्दर्य र पा:लाम साम्लो बारे विचार मन्थन गरे । पा:लाम सर्जक सुवर्ण नेम्वाङले भने- 'पालाम केवल गीत होइन पालाम हाम्रो संस्कृति र पहिचान पनि हो ।' 

पा:लाम गयिका दुर्गा तुम्साको पा:लाम साम्लो 'चौबिसमा मेन्छिन' भाग-२ (लुङहा:त् पा:लाम) मिलियन भ्यूज क्लबमा प्रवेश गरेको उपलक्ष्यमा उत्सवको आयोजना गरिएको छ । उक्त अवसरमा वरिष्ठ सर्जकजरूले पा:लामको इतिहास, सांस्कृतिक पक्ष र अभ्यासका बारेमा विचार राखेका छन् । 

प्रमुख अतिथिको शुभकामना मन्तव्य राख्दै सर्जक अम्विका सम्वाहाम्फेले पुस्तान्तरणका लागि सीप हस्तान्तरण आवश्यक रहेको बताए । उनले युवाहरू विदेशिएकाले ६० वर्षमाथिकाले धान नाच्नुनुपरेको सुनाए । 

छथरे भाषाको पालाम साम्लो 'चौबिसमा मेन्छिन' लाई युट्युबमार्फत १० लाख बढी दर्शकले हेरेकोमा खुसी व्यक्त गर्दै अतिथि हेमकर्ण तुम्साले शुभकामना दिए । उनले पा:लाम याक्थुङ लिम्बूहरूको जीवन पद्धति र संस्कृति भएको बताए । 

उक्त अवसरमा पा:लामका म्युजिक भिडिओ निर्देशक लगायत कलाकारलाई सम्मान गरिएको थियो । साथै केक काटेर उत्सव मनाइएको थियो । 

पा:लाम गयिका दुर्गा तुम्साको पा:लाम साम्लो 'चौबिसमा मेन्छिन' भाग-२ (लुङहा:त् पा:लाम) १० लाख बढी दर्शकले हेरेका छन् ।