चौथो धरान मेघा रेवाहाङ स्मृति बास्केटबलको उपाधि धरान मेघालाई

उदयमान बास्केटबल खेलाडी स्वर्गीय रेवाहाङ राईको स्मृतिमा आयोजना गरिएको चौथो धरान मेघा रेवाहाङ स्मृति बास्केटबल प्रतियोगिताको उपाधि धरान मेघा हिमालयन कलेजले जितेको छ।
     आइतबार कलेजको बास्केटबल कोर्टमा सम्पन्न फाइनल खेलमा धरान मेघाले हिमशिखर इङ्लिस बोर्डिङ स्कुललाई ८५–७५ अंकको अन्तरले पराजित गर्दै उपाधि हात पारेको बास्केटबल कोच युगल माबो लिम्बुले जानकारी दिए।
प्रतियोगिताका विजेता धरान मेघाले नगद ३० हजार रुपैयाँसहित ट्रफी, मेडल र प्रमाणपत्र प्राप्त गरेको छ भने उपविजेता हिमशिखर इङ्लिस बोर्डिङले नगद १५ हजार रुपैयाँसहित ट्रफी, मेडल र प्रमाणपत्र प्राप्त गरेको छ।
     यसैगरी प्रतियोगिताको मोस्ट भ्यालुएबल प्लेयर (MVP) धरान मेघाका निश्चल मगर घोषित भए। उनले नगद २ हजार ५ सय रुपैयाँसहित ट्रफी, मेडल र प्रमाणपत्र प्राप्त गरे।
राइजिङ प्लेयर तर्फ लोटस इङ्लिस बोर्डिङका शुभम शाही घोषित भए। उनले नगद १ हजार ५ सय रुपैयाँसहित ट्रफी, मेडल र प्रमाणपत्र पाए।
विजेता तथा उत्कृष्ट खेलाडीहरूलाई कार्यक्रमका प्रमुख अतिथि कोशी प्रदेशका आर्थिक मामिला तथा योजना मन्त्री बिदुर लिङ्थेप, कोशी प्रदेशसभा सदस्य रमेश कुमार बस्नेत, कलेजका प्रिन्सिपल भास्कर पौडेल लगायतले पुरस्कार वितरण गरे।
     कार्यक्रमलाई सम्बोधन गर्दै मन्त्री लिङ्थेपले धरान खेलकुद क्षेत्रमा अग्रणी रहेको उल्लेख गर्दै यसको विकासका लागि प्रदेश सरकारले सक्दो सहयोग गर्ने प्रतिबद्धता जनाए। धरान उपमहानगरपालिकाका कार्यवाहक मेयर अइन्द्र विक्रम बेघाले धरान मेघा कलेजले प्रतियोगिता आयोजना गरी खेलाडीलाई प्रोत्साहन गरेको भन्दै स्थानीय सरकारले पनि आवश्यक सहयोग गर्ने बताए। कोशी प्रदेशसभा सदस्य विजय राईले खेलकुद विकासमा सबैको साझा पहल आवश्यक रहेकोमा जोड दिए।दक्ष बास्केटबल खेलाडी उत्पादन गरि उचित प्लेटफम प्रदान गर्न प्रतियोगिता आयोजना गरिएको कलेजका शैक्षिक निर्देसक अर्जुन घिमिरेले जानकारी दिए।
  स्वर्गीय रेवाहाङ राईको २०७७ साल माघ २० गते १६ वर्षको उमेरमा निधन भएको थियो। उनका बुवा रेवतिरमण राई र आमा सुजता राईले उनको स्मृतिमा अक्षयकोष स्थापना गरी यस प्रतियोगितालाई निरन्तरता दिँदै आएका छन्।
माघ ६ गतेदेखि सुरु भएको प्रतियोगिता आइतबार सम्पन्न भएको हो।