मोरङ रंगेलीमा घरेलु विवादका क्रममा छुरा प्रहार, दम्पतीको मृत्यु

मोरङ । मोरङको रंगेली नगरपालिका–५ स्थित धनपती गाउँमा घरेलु विवादका क्रममा छुरा प्रहार हुँदा एक दम्पतीको मृत्यु भएको छ।
रंगेली बहुभवन निवासी २१ वर्षीय मुकेश मण्डलले आफ्नै श्रीमती अम्विका मण्डलको छुरा प्रहार गरी हत्या गरेपछि स्वयं घाँटी रेटी आत्महत्या गरेको मोरङ प्रहरीले जनाएको छ।
मोरङ प्रहरीका अनुसार सोमबार साँझ मुकेश मण्डल र उनकी श्रीमती अम्विका मण्डल रंगेली–५ धनपतीस्थित ससुराली घर पुगेका थिए। सोही राति करिब २ः५० बजेतिर दुवैबीच भएको घरेलु विवाद मंगलबार बिहान डरलाग्दो घटनामा परिणत भएको हो।
प्रहरीका अनुसार विवादपछि मुकेशले श्रीमतीलाई कुटपिट गर्दै छुरा प्रहार गरेका थिए। गम्भीर घाइते भएकी अम्विका मण्डलको घटनास्थलमै मृत्यु भएपछि मुकेशले सोही छुराले आफ्नो घाँटी रेटी आत्महत्या गरेको प्रारम्भिक अनुसन्धानबाट खुलेको मोरङ प्रहरी प्रमुख (एसपी) कवित कटुवाले जानकारी दिनुभयो।
घटनास्थलको मुचुल्का उठाई दुवैको शव विराटनगरस्थित कोशी अस्पतालमा पोस्टमार्टमका लागि राखिएको छ। घटनाबारे थप अनुसन्धान भइरहेको प्रहरीले जनाएको छ।