२६ औं बुढासुब्बा गोल्डकप: प्लानिङ ब्वाइज फाइनलमा

धरान / धरान-१६ स्थित रङ्गशालामा जारी २६ औं  संस्करणको अन्तर्राष्ट्रिय आमन्त्रण बुढासुब्बा गोल्डकपमा प्लानिङ ब्वाइज युनाइटेड काठमाडौं फाइनल प्रवेश गरेको छ ।

बुधबार पहिलो सेमिफाइनल खेलमा २-१ गोल अन्तरले लालिगुरास एसोसिएसन पोखरालाई पराजित गर्दै प्लानिङ ब्वाइज फाइनल प्रवेश गरेको हो ।

पहिलो हाफको छैटौ मिनेटमा लालिगुरास एसोसिएसन पोखराका स्कन्दर सिद्धिकीले गोल गरे ।
खेलको दोस्रो हाफमा डिबक्सभित्र फउल भएपछि पाएको  पेनाल्टीमा प्लानिङ ब्वाइजका विलियम एलेक्सले  गोल गर्दै खेलालाई बराबरीमा पुर्‍याए ।

दोस्रो हाफको ४२ औं  मिनेटमा प्लानिङ ब्वाइज युनाइटेडका प्रताप सिंह राईको गोल नै निर्णायक बन्यो ।
खेलको म्यानअफ द म्याच प्लानिङ ब्वाइजका प्रतापसिंह राइले नगद १० हजार रुपैयाँ  प्राप्त गरे ।

पहिलो हाफको सुरुवातमै भएको  विवादमा लालिगुरासका पोखराका स्कन्दर सिद्धिकीले  रेड कार्ड पाउँदै मैदानबाट बाहिरिए । पोखराका टिम मेनेजर इश्वर बस्यालले पनि  पनि रेड कार्ड पाए ।

क्वाटर फाइनलमा आयोजक  धरान फुटबल क्लबका विरुद्ध जित निकालेको लालिगुरास टिम हो भने न्यूरोड टिम काठमाडौं (एनआरटी) विरुद्ध  प्लानिङ ब्वाइज युनाइटेड काठमाडौंले जित निकालेको थियो।

बुढासुब्बा गोल्डकपको उपाधि विजेताले ट्रफी र मेडलसहित नगद १० लाख र उपविजेताले ५ लाख रुपैयाँ प्राप्त गर्नेछन् । सर्वोत्कृष्ट खेलाडीले डियो स्कुटर पाउने छन् । प्रतियोगितामा १० टिमले सहभागिता जनाएका थिए ।