विर्तामोडमा कोशी प्रदेशस्तरीय खोज पत्रकारिता तालिम सम्पन्न

विर्तामोड, झापा — नारी सञ्चार गृह झापाको आयोजनामा कोशी प्रदेशस्तरीय तीन दिने खोज पत्रकारिता तालिम विर्तामोडमा सम्पन्न भएको छ। माघ २७ गतेदेखि २९ गतेसम्म सञ्चालन भएको उक्त तालिममा कोशी प्रदेशका विभिन्न जिल्लाबाट ३२ जना महिला पत्रकारहरूको सहभागिता रहेको थियो।
तालिमको मुख्य प्रशिक्षण वरिष्ठ पत्रकार बविता बस्नेतले गर्नुभएको थियो। प्रशिक्षणका क्रममा उहाँले अनुसन्धानमूलक पत्रकारिताका आधारभूत सिद्धान्त, सूचना संकलनका विधि, रिपोर्टिङका क्रममा ध्यान दिनुपर्ने संवेदनशील पक्ष तथा खोज पत्रकारिताको महत्वबारे विस्तृत जानकारी दिनुभयो।
विशेषगरी ‘महिला र राजनीति’ विषयमा कसरी प्रभावकारी र तथ्यपरक रिपोर्टिङ गर्ने भन्ने विषयमा केन्द्रित सत्र सञ्चालन गरिएको थियो। आधुनिक प्रविधिको प्रयोगमार्फत समाचार तयार गर्ने विधिबारे प्रयोगात्मक अभ्याससमेत गराइएको थियो।
त्यसैगरी, पत्रकार उमाकान्त खनालले ‘डिजिटल स्टोरीटेलिङ’ मार्फत समाचारलाई आकर्षक र प्रभावकारी ढंगले प्रस्तुत गर्ने तरिकाबारे सहभागीहरूलाई प्रयोगात्मक ज्ञान प्रदान गर्नुभयो।
तालिमका मुख्य विषयवस्तुमा खोज पत्रकारिताका अनुसन्धानका चरण, सूचना संकलनका विधि, राजनीतिक क्षेत्रमा महिलाको उपस्थिति र मुद्दामा केन्द्रित रिपोर्टिङ तथा मल्टिमिडियाको प्रयोगमार्फत डिजिटल स्टोरीटेलिङ समावेश रहेका थिए।
दोस्रो दिनको कार्यक्रममा बोल्दै सहभागीहरूले खोज पत्रकारिताको प्राविधिक पक्ष तथा डिजिटल माध्यमको प्रयोगबारे सिक्न पाउँदा आफ्नो व्यावसायिक क्षमता अभिवृद्धिमा महत्वपूर्ण सहयोग पुगेको प्रतिक्रिया दिएका थिए।
नारी सञ्चार गृहकी अध्यक्ष सोस्तिका आचार्यले महिला पत्रकारहरूको दक्षता अभिवृद्धि गर्ने उद्देश्यले यस्ता कार्यक्रमलाई निरन्तरता दिँदै आएको बताउनुभयो।
कार्यक्रम नारी सञ्चार गृहकी संस्थापक अध्यक्ष सावित्रा दाहाल, पूर्व अध्यक्ष एवं नेपाल पत्रकार महासंघ कोशी प्रदेश उपाध्यक्ष अविका भण्डारी, भिमा शिवाकोटी, रेजिना गौतम, जोस्ना श्रेष्ठ, विनिसा शर्मा लगायतको उपस्थितिमा सम्पन्न भएको थियो।