एन्फा महिला फुटबल च्याम्पियनसिप–२०८२: APF Football Club को कीर्तिमानी जित, RS Resort & Beach Football Club १९–० ले पराजित

उदयपुर, गाईघाट ।
उदयपुरको त्रियुगा नगरपालिकास्थित थरुहट रंगशालामा जारी एन्फा महिला फुटबल च्याम्पियनसिप–२०८२ अन्तर्गत विभागीय टोली एपीएफ फुटबल क्लबले कीर्तिमानी जित दर्ता गरेको छ।

सोमबार सम्पन्न खेलमा सशस्त्र प्रहरी बलको APF Football Club ले RS Resort & Beach Football Club लाई १९–० को फराकिलो अन्तरले पराजित गर्दै प्रतियोगितामा सानदार अग्रता लिएको हो।

खेलको सुरुवातदेखि नै आक्रामक बनेको एपीएफले विपक्षी टोलीलाई निरन्तर दबाबमा राखेको थियो। खेलको सातौँ मिनेटमै जर्सी नम्बर ७ की अनिता केसीले गोलको खाता खोलिन्। त्यसपछि एपीएफले लगातार आक्रमण जारी राख्दै पहिलो हाफमै ७ गोल गर्दै खेल आफ्नो पक्षमा पारेको थियो।

जर्सी नम्बर १९ की रश्मि कुमारी घिसिङले ३५औँ मिनेटमा गोल गर्दै अग्रता फराकिलो बनाइन् भने ४५औँ मिनेटमा पुनः गोल थपिन्। उत्कृष्ट प्रदर्शन गरेकी रश्मिले दोस्रो हाफमा पनि ५२औँ र ८३औँ मिनेटमा गोल गर्दै टोलीको जितलाई ऐतिहासिक बनाइन्। बहु–गोलकर्त्री बनेकी घिसिङ खेलको ‘म्यान अफ द म्याच’ घोषित भइन्।

राष्ट्रिय टोलीकी फरवार्ड सावित्राले पनि ह्याट्रिक गर्दै टोलीको जितमा महत्वपूर्ण योगदान दिइन्। जर्सी नम्बर ८ की सरु लिम्बुले दोस्रो हाफको १०औँ मिनेटमा गोल थपिन् भने निशा ठोकर, गीता राना, हिमा राउत र मनमाया धिमालगायत खेलाडीहरूले पनि एक–एक गोल गर्दै स्कोरलाई १९–० पुर्‍याए।

टोलीकी कप्तान अनिता बस्नेतले सटिक क्रस र फ्री–किकमार्फत गोलका अवसर सिर्जना गर्दै टोलीलाई संगठित रूपमा अघि बढाएकी थिइन्।

आर.ए. सिर्टले केही अवसर सिर्जना गर्ने प्रयास गरे पनि एपीएफको अनुभवी रणनीति र सशक्त प्रदर्शनका अघि निरिह देखियो।

प्रतियोगिता अन्तर्गत मंगलबार त्रिभुवन आर्मी क्लब र नियुरो टिम काठमाडौंबीच प्रतिस्पर्धा हुने आयोजकले जनाएको छ। फाइनल खेल फागुन ९ गते हुने छ। प्रतियोगिताको विजेताले ७ लाख ५ हजार रुपैयाँ तथा उपविजेताले ३ लाख रुपैयाँसहित ट्रफी, मेडल र प्रमाणपत्र प्राप्त गर्नेछन्।