धरान रनको थिम सङ्ग्स सार्वजनिक, फागुन ९ गते १४औँ संस्करण हुँदै

धरान । धरानलाई राष्ट्रिय तथा अन्तर्राष्ट्रिय स्तरमा चिनाउने तथा धरानेहरूको पहिचानलाई थप टेवा पुर्‍याउने उद्देश्यले निर्माण गरिएको ‘धरान रन’ को थिम सङ्ग्स सार्वजनिक गरिएको छ।
मंगलबार Dharan–२ स्थित साधना भवन परिसरमा रहेको Level Up Restaurant मा आयोजित पत्रकार भेटघाट कार्यक्रममार्फत उक्त थिम सङ्ग्स सार्वजनिक गरिएको हो।
“रन रन रन धरान रन” बोलको गीत प्रमोद पोर्तेल को शब्द तथा संगीतमा तयार गरिएको हो। गीतमा पोर्तेलकै स्वर रहेको छ।
धरान उपमहानगरपालिकाका विभिन्न स्थानहरूमा विगतका संस्करणहरूमा सम्पन्न भएका ‘धरान रन’ का गतिविधिहरूलाई समेटेर भिडियो निर्माण गरिएको आयोजकले जनाएको छ। उक्त थिम सङ्ग्सको मिडिया अर्गनाइजर बी टिभी रहेको छ भने मिडिया पार्टनरका रूपमा Vijaypur FM रहेको छ।
भिडियो मंगलबार प्रमोद पोर्तेलको अफिसियल यूट्युब च्यानलमार्फत सार्वजनिक गरिएको हो। नेपाली भाषामा रहेको यस थिम सङ्ग्सले खेलप्रेमी तथा युवापुस्तालाई प्रेरित गर्ने अपेक्षा गरिएको छ।
धरान रनको १४औँ संस्करण यही आउँदो फागुन ९ गते धरानमा आयोजना हुने आयोजकले जानकारी दिएको छ। प्रतियोगितालाई सफल बनाउन तयारी तीव्र पारिएको बताइएको छ।