धरानमा ३५०० धावक उत्रने तयारी : ‘गोफी धरान १० के रन २०२६’ नन्दा कुमार राईको स्मृतिमा

धरान । खेल पर्यटन र सामाजिक उत्तरदायित्वलाई सँगै अघि बढाउने उद्देश्यसहित ‘गोफी धरान १० के रन २०२६’ अन्तर्गत १४ औँ नेवा च्यारिटी रनको तयारी तीव्र पारिएको छ। मंगलबार भानुचोकस्थित धरान किचेन हलमा आयोजित पत्रकार सम्मेलनमार्फत आयोजकले कार्यक्रमबारे विस्तृत जानकारी सार्वजनिक गरेका छन्।
यस वर्षको दौड दिवंगत नन्दा कुमार राईको स्मृतिमा समर्पित गरिएको आयोजकले जनाएको छ। करिब ३२०० देखि ३५०० धावक–धाविका सहभागिताको अपेक्षा गरिएको यस प्रतियोगितालाई हालसम्मकै ठूलो संस्करणका रूपमा प्रस्तुत गरिएको छ।
कार्यक्रममा सांगीतिक आकर्षण पनि थपिने भएको छ। चर्चित गायक राजु लामा र ‘The Voice of Nepal’ सिजन ७ की विजेता नीता थापा मगर को विशेष उपस्थिति रहने जनाइएको छ।
धावक–धाविकाको सुरक्षालाई ध्यानमा राख्दै एक दिनका लागि अधिकतम एक लाख रुपैयाँसम्मको स्वास्थ्य बीमा सुविधा प्रदान गरिने आयोजकले स्पष्ट पारेका छन्। यसले खेलकुद कार्यक्रमलाई सुरक्षित र व्यवस्थित बनाउने विश्वास व्यक्त गरिएको छ।
मुख्य प्रायोजकका रूपमा गोफी क्लोदिङ ब्रान्ड रहेको छ भने सह–प्रायोजक तथा मेडिकल पार्टनरका रूपमा विराट मेडिकल कलेज, विराट क्यान्सर इन्स्टिच्युट, न्युमिउ, बराह गार्मेन्ट, नेपाल रन यूके र सगरमाथा टेलिभिजन लगायतका संस्थाहरू जोडिएका छन्।
पुरस्कार संरचना
खुल्ला तर्फ (महिला/पुरुष)
• प्रथम – ६०,००० रुपैयाँ
• द्वितीय – ४०,००० रुपैयाँ
• तृतीय – ३०,००० रुपैयाँ
अण्डर–१३, अण्डर–१६, भेट्रान तथा मिड भेट्रान (महिला/पुरुष)
• प्रथम – ७,००० रुपैयाँ
• द्वितीय – ५,००० रुपैयाँ
• तृतीय – ३,००० रुपैयाँ
सुपर भेट्रान (महिला/पुरुष)
• प्रथम – ७,००० रुपैयाँ
ह्विलचेयर (महिला/पुरुष)
• प्रथम – ५,००० रुपैयाँ
• द्वितीय – ३,००० रुपैयाँ
• तृतीय – २,००० रुपैयाँ
स्थानीय धावक–धाविकालाई ५ हजार रुपैयाँ बराबरको उपहार प्रदान गरिनेछ भने वडा अध्यक्ष रनिङ दौडका विजेतालाई शिल्ड पुरस्कार दिइने जनाइएको छ।
आयोजकले यस प्रतियोगितामार्फत धरानलाई खेल पर्यटनको गन्तव्यका रूपमा स्थापित गर्ने विश्वास व्यक्त गरेका छन्। ठूलो संख्यामा सहभागी, आकर्षक पुरस्कार र सांगीतिक प्रस्तुतिले यस वर्षको ‘गोफी धरान १० के रन २०२६’ लाई थप भव्य बनाउने अपेक्षा गरिएको छ।