धरान मेघा हिमालयन स्कुलको २१औँ अभिभावक दिवस सम्पन्न

धरान, ८ फागुन:धरान–१२ स्थित धरान मेघा हिमालयन स्कुलले शुक्रबार आफ्नो २१औँ अभिभावक दिवस तथा पुरस्कार वितरण कार्यक्रम स्कुलको प्राङ्गणमा सम्पन्न गरेको छ।
     कार्यक्रमका प्रमुख अतिथि एन प्याब्सन धरानका अध्यक्ष भगत लिम्बुले विद्यालयको मात्रै भर पर्नु नहुने बताउँदै अभिभावकको भूमिका महत्वपूर्ण रहेको बताए। उनले आफ्ना छोराछोरीको सङ्गत, नियमित अध्ययन, समयमै विद्यालय उपस्थिती तथा गृहकार्यप्रति अभिभावकले निगरानी राख्नुपर्नेमा जोड दिए।
     स्कुलका प्रिन्सिपल भाष्कर पौडेलले मेघा हिमालयन अब धरानमा चिनाईरहनु नपर्ने गरी स्थापित ‘ब्रान्ड’ बनिसकेको बताए। नर्सरीदेखि स्नातकसम्म एउटै छानोमुनि अध्यापन गराउँदै आएको यस शैक्षिक संस्थाले प्लस टु तहमा जस्तै विद्यालय तहको शैक्षिक गुणस्तर अभिवृद्धि गर्न सम्पूर्ण टिम प्रतिबद्ध भएर लागेको उनले उल्लेख गरे।
   संचालक सदस्य राजेश बिद्रोहीले विद्यार्थीहरूको सर्वाङ्गीण विकासका लागि पठन–पाठनसँगै अतिरिक्त क्रियाकलापमा समेत विद्यालयले विशेष प्राथमिकता दिएको बताए।
सोही अवसरमा खेलकुद सप्ताह तथा विभिन्न अतिरिक्त क्रियाकलापमा उत्कृष्ट हुने विद्यार्थीहरूलाई शैक्षिक निर्देशक अर्जुन घिमिरे, स्कुल इन्चार्ज नवराज दाहाल, कोअर्डिनेटर जीवन न्यौपाने तथा संचालक सदस्य चन्द्र वनेमलगायतले पुरस्कार तथा प्रमाणपत्र वितरण गरे।
     कार्यक्रममा विद्यार्थीहरूले गीत, नृत्य, राइम र नाटक प्रस्तुत गरी अभिभावकलाई मनोरञ्जन प्रदान गरेका थिए।
विद्यालय र अभिभावकबीच सहकार्य सुदृढ गर्दै विद्यार्थीको समग्र विकासमा केन्द्रित सन्देशसहित कार्यक्रम सम्पन्न भएको आयोजकले जनाएको छ।